Мақомоти беҳдоштии Тоҷикистон аз бими сирояти бемории “илтиҳоби мағз” ва ё менингит дар фурудгоҳҳо чораҳои беҳдоштии иловагӣ андешиданд.
Мизроб Низомов, сардори Сарраёсати амнияти санитариву эпидемиологии вазорати тандурустӣ гуфтааст, чораҳои изофӣ баъди хуруҷи ин беморӣ дар Қазоқистон андешида шуданд.
Ӯ афзуд, ки “Мо дар гузаргоҳҳо нуқтаҳои санитарӣ-карантинӣ боз кардем ва ҳамчунин дастгоҳе гузоштаем, ки ҳарорати бадани мусофирро маълум мекунад. Кормандони мо дар сурати мушоҳидаи таби баланд мусофирро муоина мекунанд ва вобаста ба натиҷаи ташхис мусофир ба беморхона фиристода мешавад”.
Ба гуфтаи Низомов, то кунун ҳеҷ мавриди сирояти ин бемории хатарнок дар Тоҷикистон сабт нашудааст. Мусофирати шаҳрвандони Тоҷикистон ба Қазоқистон зиёд аст ва ҳафтае як маротиба садҳо нафар байни ду кишвар равуо мекунанд.
Танҳо дар соли 2017 ба бештар аз 13 ҳазор аз шаҳрвандони Тоҷикистон барои кор ба Қазоқистон рафтаанд. Аз ин рӯ ба гуфтаи мақомоти беҳдоштӣ, андешидани тадобири иловагӣ барои пешгирӣ аз сирояти бемории илтиҳоби мағз ба Тоҷикистон зарур аст.
Дар чанд моҳи гузашта дар Қазоқистон дар натиҷаи гирифторӣ ба илтиҳоби мағз 13 нафар ҳалок шуданд. Вазорати тандурустии ин кишвар гуфт, дар шаҳрҳои Алмаато, Қизилорда ва вилояти Қазоқистони ҷанубӣ дар умум 59 нафар аз ҷумла 21 кӯдаки то 14-сола мубталои илтиҳоби мағз шудаанд.
Манбаъ: Сомонаи «Тоҷикистонтаймс»
Нет комментариев