Ҳайати ҳакамони Озмуни XV байналмилалии «Санъати китоб»-и Шӯрои байнидавлатӣ оид ба ҳамкорӣ дар соҳаи матбуоти даврӣ, нашри китоб, савдою тавзеҳи китоб ва корҳои ноширии кишварҳои ИДМ, ки 29 июни соли 2018 дар Китобхонаи миллии Тоҷикистон сурат гирифт, «Донишномаи фарҳанги мардумии халқи тоҷик»-ро бо як овоз сазовори Шоҳҷоизаи озмун донистанд.
Донишномаи мазкур аз ҷониби Сарредаксияи илмии энсиклопедияи миллии тоҷик интишор ёфтааст.
Инчунин ду китоби дигар дар бахшҳои гуногун сазовори ҷойҳои аввал гардиданд: «Мероси фарҳанги ғайримодии Тоҷикистон» (нашриёти Эр-граф) дар бахши «Гуфтугӯи фарҳангҳо» ва «Шиносоӣ ва хотира» (Н. Сафаров, Сарредаксияи илмии энсиклопедияи миллии тоҷик) дар бахши «Адабиёти таьлимӣ «.
Китобҳои «Пешвои миллат ва эҳёи фарҳанги миллӣ» (нашриёти Ношир) дар бахши «Нашри Иттиҳод» ва «Тақсимоти маъмурии Ҷумҳурии Тоҷикистон» (Сарредаксияи илмии энсиклопедияи миллии тоҷик) дар бахши «Кишвари ман» сазовори ҷойҳои дуввуми озмун гардиданд.
«Дили Осиё. Тоҷикистон ва тоҷикон дар назми рус» («Сердце Азии. Таджикистан и таджики в русской поезии») (нашриёти Маориф) дар бахши «Иттиҳод», «Биё шоҳмот мебозем» (Н. Салоҳиддинзода, нашриёти Маориф) дар бахши » Китоб барои кӯдакону наврасон » , китоби «Кавалерийские дивизии, сформированные в Таджтикистане в боях против Вермахта» (Г. Шерматов, нашриёти Орбита) дар бахши «Санъати ороиш», инчунин фотоальбоми «Хуҷанд» дар бахши «Арт-китоб» ҷойҳои сеюмро ба даст оварданд.
Инчунин аъзои ҳакамон пешниҳод намуданд, ки ба «Донишномаи донишмандони Тоҷикистон дар ибтидои қарни XXI» ва Донишномаи кӯдакони «Чӣ, кай, дар куҷо?», ки ҳар ду нашри Сарредаксияи илмии энсиклопедияи миллии тоҷик мебошанд, дипломҳои махсуси озмун супорида шавад.
Боиси зикр аст, ки Озмуни байналмилалии «Санъати китоб»-и Шӯрои байнидавлатӣ оид ба ҳамкорӣ дар соҳаи матбуоти даврӣ, нашри китоб, савдою тавзеҳи китоб ва корҳои ноширии кишварҳои ИДМ аз соли 2004 инҷониб баргузор мегардад. Соли ҷорӣ дар озмуни мазкур зиёда аз 50 адабиёти тозанашр (нашри солҳои 2017-2018) аз кишварҳои Тоҷикистон, Қазоқистон, Қирғизистон, Туркманистон, Россия ва Беларус иштирок намуда, ҳайати бонуфузи ҳакамон, ки намояндагони Тоҷикистон, Қазоқистон, Қирғизистон, Россия ва Беларус мебошад, ғолибони озмунро дар бахшҳои гуногун муайян намуданд.
Ҳакамони озмун зикр намуданд, ки аз Тоҷикистон соли равон барои иштирок дар озмун се Донишнома пешниҳод гардид. «Нашри се Донишнома дар муддати як-ду сол кори саҳл нест, ва ин аз он далолат медиҳад, ки дар Ҷумҳурии Тоҷикистон ба нашри адабиёти зарурӣ диққати ҷиддӣ медиҳанд», — гуфт Александр Воропаев, ки аъзои ҳакамон аз Федератсияи Россия буд.
Боиси зикр аст, ки соли ҷорӣ Ҷумҳурии Тоҷикистон раисии Шӯрои байнидавлатӣ оид ба ҳамкорӣ дар соҳаи матбуоти даврӣ, нашри китоб, савдою тавзеҳи китоб ва корҳои ношириро ба уҳда дорад ва мутасаддии Озмуни XV байналмилалии «Санъати китоб»-и Шӯрои байнидавлатӣ оид ба ҳамкорӣ дар соҳаи матбуоти даврӣ, нашри китоб, савдою тавзеҳи китоб ва корҳои ноширии кишварҳои ИДМ дар Ҷумҳурии Тоҷикистон Муассисаи давлатии «Агентии миллии Созмони байналмилалии рақамгузории стандарти китоб – Хонаи китоби Тоҷикистон» мебошад.
Нет комментариев