Дар деҳаи Сафедтеппаи Ҷамоати деҳоти Истиқлоли ноҳияи Спитамен бо иштироки Раиси вилояти Суғд Раҷаббой Аҳмадзода маркази хизматрасонӣ ва коргоҳи дӯзандагии “Райҳона” мавриди истифода қарор гирифт.
Маркази хизматрасонӣ ва коргоҳи дӯзандагии “Райҳона” бо мақсади иҷрои дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати таъсиси коргоҳҳои дӯзандагӣ ва бо ҷойи корӣ таъмин намудани занону бонувон аз ҷониби соҳибкорони маҳаллӣ бунёд шудааст.
Дар ошёнаи якуми бинои дуошёна маркази савдо ҷой дода шуда, дар ошёнаи дуюми он коргоҳи дӯзандагӣ таъсис дода шудааст. Бо ба фаъолият оғоз намудани коргоҳи дӯзандагӣ 20 нафар занону духтарони деҳа бо ҷойи корӣ таъмин шудаанд.
Тавре ба Раиси вилоят иттилоъ доданд, маоши кормандони коргоҳ дар ҳоли ҳозир 500 сомониро ташкил медиҳад. Раҷаббой Аҳмадзода ба роҳбарияти коргоҳи дӯзандагӣ супориш дод, ки доираи фаъолияти хешро васеъ намуда, барои то 1200 сомонӣ баланд намудани маоши коргарон тадбирҳои заруриро амалӣ созанд. Тавсия дода шуд, ки коргоҳ бо муассисаҳои таълимии ноҳия ҳамкорӣ намуда, барои омода намудани либосҳои мактабӣ фармоиш қабул намояд.
Сипас, Раиси вилоят бо корҳои сохтмонии бинои иловагии муассисаи таҳсилоти миёнаи умумии №9 –уми деҳаи Сафедтеппа шинос шуд.
Тавре қайд гардид, бо назардошти зиёд шудани шумораи хонандагон дар назди ин муассиса бинои иловагӣ сохта мешавад. Зимни шиносоӣ Раиси вилоят тавсия дод, ки ба сифати корҳои сохтмонӣ диққати бештар бидиҳанд, то бино солҳои зиёд ба мардум хизмат расонад.
Манбаъ: Хадамоти матбуоти Раиси вилояти Суғд
Нет комментариев