Рӯзи гузаша дар маҷлисгоҳи Муассисаи давлатии “Боғи миллии Ваҳдат” нишасти матбуотии Раиси вилояти Суғд Раҷаббой Аҳмадзода баргузор гардид, ки дар он 80 нафар журналистони расонаҳои гуногун иштирок намуданд.
Раиси вилоят Раҷаббой Аҳмадзода иброз дошт, ки кишвари соҳибистиқлоламон – Тоҷикистон дар марҳалаи таърихӣ ва давраи нави рушд қарор дорад ва мардуми диёри куҳанбунёдамон баҳри сазовор истиқбол гирифтани ҷашни 30 – солагии Истиқлолияти давлатии Ҷумҳурии Тоҷикистон саъю талоши комил ва меҳнати шоиста доранд. Дар ин раванд дар ҷумҳурӣ бо азму иродаи қавӣ ва раҳнамоии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон корҳои басо бузурги созандагиву ободкорӣ амалӣ мегарданд.
Тибқи Фармони Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон ва қарори Раиси вилоят дар қаламрави вилоят низ корҳои шоиста амалӣ гардида, Нақшаи чорабиниҳои Мақомоти иҷроияи ҳокимияти давлатии вилоят тасдиқ шудааст ва то ҷашни бузурги миллӣ дар вилоят беш аз 3000 иншооти иҷтимоиву иқтисодӣ бунёд хоҳад гашт.
Дар нишасти матбуотӣ иттилоъ дода шуд, ки дар нимсолаи аввали соли равон рушди устувори иқтисодию иҷтимоии вилоят таъмин шуда, нақшаи воридоти андозҳо ба буҷети давлатӣ ва буҷети суғуртаи иҷтимоӣ ва нафақа сари вақт ва босифат иҷро гардид.
Дар ин давра нақшаи даромадҳои буҷети давлатӣ (бе дарназардошти андози иҷтимоӣ) ба андозаи 107,0 фоиз таъмин гардида, ба буҷет 994,2 млн сомонӣ ворид гардид, ки нисбат ба нақшаи тасдиқгардида 65,4 млн сомонӣ ва нисбат ба ҳамин давраи соли гузашта 132,1 млн сомонӣ зиёд мебошад. Ба буҷети маҳаллии вилоят ба ҷойи 770,9 млн сомонӣ 804,2 млн сомонӣ ворид гардид, ки аз нақша 4,3 фоиз ё 33,3 млн сомонӣ ва нисбати ҳамин давраи соли сипарӣ 54,5 млн сомонӣ ё 10,7 фоиз зиёд аст.
Саҳми соҳаи саноат дар ташаккули маҷмӯи маҳсулоти минтақавии вилоят сол аз сол афзоиш ёфта, дар нимсолаи аввали соли ҷорӣ он 34,4 фоизро ташкил намуд. Суръати афзоиши маҷмӯи маҳсулоти минтақавии вилоят дар моҳҳои январ-июни соли 2018 ба 107,8 фоиз ва ҳаҷми умумии он ба 7 млрд. 322,2 млн. сомонӣ расонида шуд.
Давоми шаш моҳи соли ҷорӣ ҳаҷми истеҳсоли маҳсулоти саноатӣ дар вилоят ба маблағи 4 млрд 976,1 млн. сомонӣ расонида шуда, нисбат ба ҳамин давраи соли гузашта суръати афзоиш бо назардошти индекси нархҳо 110,9 фоиз таъмин гардид. Дар ин давра таваҷҷӯҳи асосӣ ба истеҳсоли маҳсулоти воридотивазкунанда ва ба содирот нигаронидашуда зоҳир карда шуд. Аз ҷумла, дар моҳҳои январ-июни соли 2018 ба миқдори 489,7 ҳазор тонна семент ва 552,7 ҳазор тонна ангишт истеҳсол карда шудааст, ки нисбат ба ҳамин давраи соли қаблӣ мутаносибан 212,2 ҳазор тонна ё 1,8 баробар ва 58,8 ҳазор тонна ё 1,1 баробар зиёд аст.
Тибқи нақша дар соли 2018 ба истифода додани 88 корхонаву коргоҳҳои нави саноатӣ бо 1613 ҷойҳои нави корӣ дар назар дошта шудааст. Дар натиҷаи тадбирҳои андешидашуда давоми шаш моҳи соли 2018 дар миқёси вилоят 47 корхонаву коргоҳҳои нав бо 684 ҷойҳои нави корӣ ба фаъолият шурӯъ намуданд.
Кишоварзони вилоят ҷиҳати таъмини рушди соҳа тадбирҳои судманд андешида, ҳаҷми истеҳсоли маҳсулотро дар шаш моҳи соли ҷорӣ дар ҳамаи шаклҳои хоҷагидории вилоят ба 1 млрд 881,3 млн. сомонӣ расониданд, ки баробари 105,9 фоизи ҳамин давраи соли гузашта мебошад.
Баробари афзудани теъдоди хоҷагиҳои инфиродӣ масъалаҳои таъминот бо техникаи кишоварзӣ, оби полезӣ ва ҳифзи бехатарии зироатҳо аҳамияти аввалиндараҷа пайдо менамоянд.
Дар самти ислоҳоти соҳаи обрасонӣ тадбирҳо андешида шуда, дар вилоят 219 Ассотсиатсияи истифодабарандагони об фаъолият мебаранд, ки дар танзими системаи обрасонӣ ва таъминоти бонизоми заминҳои кишоварзӣ бо об нақши муҳим доранд.
Дар ин давра бо мақсади таъминоти мунтазами оби полезӣ ва беҳтар намудани ҳолати мелиоративии заминҳо аз ҳисоби буҷети вилоят барои ба мавсими киштукор омода намудани пойгоҳҳои обкашӣ 1,5 млн. сомонӣ, аз ҷумла ба ноҳияҳои Ашт 400 ҳазор сомонӣ, Зафаробод 800 ҳазор сомонӣ ва Мастчоҳ 300 ҳазор сомонӣ маблағ равона карда шуд. Илова бар ин барои омода иваз намудани 200 метр қубурҳои баландфишори пойгоҳи обкашии “Янтоқ-2” 250 ҳазор сомонӣ ва барои харидани 2 муҳаррики барқӣ ба пойгоҳи обкашии “Дилварзин-2” 2 млн. сомонӣ аз буҷети вилоят маблағ ҷудо карда шуд.
Дар нимсолаи аввали соли ҷорӣ дар самти сохтмони иншооти соҳаҳои иҷтимоию фарҳангӣ ва истеҳсолӣ тадбирҳо андешида, аз ҳисоби ҳамаи сарчашмаҳо ба маблағи 266,3 млн сомонӣ фондҳои асосӣ ба истифода дода шуданд, ки суръати афзоиш нисбат ба ҳамин давраи соли 2017 137,2 фоизро ташкил медиҳад.
Маблағгузории асосӣ дар ин давра дар ҳаҷми 521,6 млн сомонӣ азхуд шуда, корҳои сохтмонию васлгарӣ ба маблағи 442,3 млн сомонӣ иҷро гардиданд.
Дар соли 2018 таъмиру тармими 2025,3 км роҳҳо ба нақша гирифта шудааст, ки аз он 104,5 км таъмири асосӣ, 867,2 км таъмири ҷорӣ ва 1053,6 км шағалпӯш мебошад. Дар нимсолаи аввали соли ҷорӣ нақшаи таъмиру тармими роҳҳо ҳамагӣ 41,0 фоиз иҷро гардида, 828,87 км роҳҳо аз таъмир бароварда шуданд, ки аз он 44,3 км таъмири асосӣ, 330,3 км таъмири ҷорӣ ва 454,3 км шағалпӯш мебошад. Аз ҷумла, аз ҳисоби буҷети вилоят 13,2 млн сомонӣ маблағ ҷудо гардида, 25,3 км роҳҳо дар шаҳру ноҳияҳои Истаравшан, Зафаробод, Шаҳристон, Мастчоҳ, Ашт, Панҷакент, Хуҷанд, Конибодом ва Бобоҷон Ғафуров аз таъмири асосӣ бароварда шуданд.
Ҳаҷми гардиши савдои хориҷии вилоят дар моҳҳои январ-июни соли 2018 ба 1004,9 млн. доллари ИМА баробар шуда, суръати афзоиш нисбат ба ҳамин давраи соли гузашта 105,5 фоизро ташкил медиҳад. Ҳаҷми воридот 723,5 млн. доллари ИМА — ро ташкил дода, нисбати ҳамин давраи соли гузашта 1,5 млн. доллар зиёд шуда бошад ҳам, ҳиссаи он дар сохтори гардиши савдои хориҷӣ сол аз сол коҳиш меёбад. Содироти маҳсулоти кишоварзӣ афзоиш ёфта, дар шаш моҳи соли ҷорӣ 70931 тонна намудҳои гуногуни маҳсулот ба маблағи 6,2 млн. доллари ИМА содирот карда шудааст.
Баҳри фароҳам овардани муҳити мусоиди инвеститсионӣ дар доираи ҷалби сармояи дохилию хориҷӣ корҳои муайян ба сомон расонида шуда, дар моҳҳои январ-июни соли 2018 ба иқтисодиёти вилоят ба маблағи 148,2 млн. доллари ИМА сармоягузориҳо, аз ҷумла ба маблағи 69,8 млн. доллари амрикоӣ сармояи мустақим ҷалб гардидааст, ки нисбат ба ҳамин давраи соли гузашта 1,6 маротиба зиёд мебошад.
Таъмини шуғли пурмаҳсули аҳолӣ яке аз самтҳои асосии сиёсати иҷтимоии давлат буда, сатҳу сифати зиндагии сокинони мамлакат аз татбиқи босамар ва оқилонаи он вобаста аст.
Музди миёнаи маош дар ин давра мувофиқи вилоят 1029,59 сомониро ташкил намуд, ки нисбат ба ҳамин давраи соли қаблӣ 58,15 сомонӣ зиёд мебошад.
Бо мақсади таъмини рушди соҳаи сайёҳӣ аз ҷониби Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2018 “Соли рушди сайёҳӣ ва ҳунарҳои мардумӣ” эълон гардида, барои таъмини рушди бемайлони соҳа як қатор имтиёзҳо пешбинӣ шудаанд.
Ҳоло дар вилояти Суғд 22 ширкатҳои сайёҳӣ фаъолият мебаранд. Мавриди зикр аст, ки ҷуғрофияи воридшавии сайёҳон ба қаламрави вилоят сол аз сол тавсеа ёфта, дар 6 моҳи соли 2018 тавассути гузаргоҳҳои сарҳадии вилоят 371,1 ҳазор сайёҳон ворид шудаанд.
Сипас, Раиси вилоят ба саволҳои сершумори рӯзноманигорон посух гуфта, аз кормандони воситаҳои ахбори омма давъат намуд, ки ҳамкориро бо мақомоти иҷроияи ҳокимияти давлатии вилоят густариш бахшида, дар пешрафту шукуфоии Тоҷикистони соҳибистиқлол саҳми назарраси худро гузоранд.
Манбаъ: Хадамоти матбуоти Раиси вилояти Суғд
Нет комментариев