Раиси вилояти Суғд Раҷаббой Аҳмадзода бо мақсади шиносоӣ бо раванди корҳои ободониву созандагӣ, иштирок дар маросими оғози бунёди иншооти гуногун, инчунин қабули шаҳрвандон ва ҳалли мушкилоти иҷтимоӣ ба ноҳияи Куҳистони Мастчоҳ сафар кард.
Дар оғози сафар Раиси вилоят ба ноҳияи Айнӣ ташриф оварда, аз мақбара ва осорхонаи Нақибхон Туғрали Аҳрорӣ боздид намуд. Мақбара ва осорхонаи Нақибхон Туғрал дар зодгоҳаш деҳаи Зосун қарор дорад ва он соли 2015 бо ҳидоятҳои Пешвои миллат муҳтарам Эмомалӣ Раҳмон ба таҷдиду навсозӣ фаро гирифта шуда, Маҷмааи таърихӣ-фарҳангии Нақибхон Туғрал таъсис дода шуд. Маҷмаа ба муносибати 150-солагии шоири нотакрор бунёд гардида, аз оромгоҳи шоир, фаввора, муҷассамаи шоир ва айвони бо усули меъмории миллӣ кандакоришуда иборат аст.
Дар аснои боздид Раиси вилоят ба роҳбарияти ноҳия дастур дод, ки ҷиҳати муаррифии бештари иншооти нодири таърихӣ ва дар сатҳи зарурӣ нигаҳдорӣ намудани он бояд корҳои зарурӣ ба сомон расонида шавад.
Сипас, Раиси вилоят оромгоҳи Мавлоно Шамси Табрезиро, ки дар Ҷамоати деҳоти Шамтуч воқеъ аст, зиёрат намуд. Мавлоно Шамсиддин Муҳаммад ибни Алӣ ибни Маликдоди Табрезӣ яке аз шахсиятҳои камназири олами ирфон маҳсуб ёфта, аз муршидони асосии Мавлоно Ҷалолиддини Балхӣ ба шумор меравад. Тибқи бархе ривоятҳо Шамси Табрезӣ дар деҳаи Вешаби Ҷамоати деҳоти Шамтуч дафн карда шудааст.
Дар ин мавзеъи хушбоду ҳаво Раиси вилоят бо сокинони деҳа суҳбат намуда, изҳор дошт, ки ба истиқболи 30-солагии Истиқлолияти Ҷумҳурии Тоҷикистон дар ноҳияи Айнӣ сохтмони як қатор иншооти гуногун, аз ҷумла варзишгоҳ, ҳавзи шиноварӣ, боғи истироҳативу фароғатӣ, меҳмонхона сохта мешавад. Дар ин росто аз сокинони ноҳия даъват карда шуд, ки бо шукргузорӣ аз оромиву осоиштагии кишвар барои тақвияти корҳои ободонӣ саҳмгузор бошанд.
Сокинони ноҳияи Айнӣ аз таваҷҷуҳи роҳбарияти олии мамлакат ва вусъати корҳои ободонӣ дар ноҳия изҳори хушнудӣ намуда, ба Пешвои миллат муҳтарам Эмомалӣ Раҳмон миннатдорӣ баён намуданд.
Манбаъ: Хадамоти матбуоти Раиси вилояти Суғд
Нет комментариев