3 июл Ҳунарпешаи мардумии Тоҷикистон, операсарои маъруфи тоҷик Адҳам Холиқов дар синни 76 аз олам даргузашт. Дар ин хусус ба АМИТ «Ховар» дар Вазорати фарҳанги мамлакат иттилоъ доданд.
Адҳам Холиқов Донишкадаи давлатии санъати Тоҷикистон ба номи Мирзо Турсунзодаро соли 1970, Консерваторияи давлатии шаҳри Москваро соли 1979 хатм карда, солҳои 1970—1980 сарояндаи ансамбли «Красная звезда»-и шаҳри Москва, аз соли 1980 овозхони Театри давлатии академии опера ва балети ба номи Садриддин Айнӣ буд.
Маҳорати сарояндагии хешро дар Академияҳои операвии Италия сайқал додааст. Адҳам Холиқов маҳорати баланди сарояндагӣ дар овозхонии операвии асарҳои классикии миллӣ, рус ва хориҷиро дошт. Бо иштироки ин овозхони хушсалиқа дар консерту спектаклҳо аз рӯи асарҳои композиторони тоҷик ва аврупоӣ сурудҳои операвӣ ва халқӣ дар хориҷи мамлакат садо медиҳанд.
Дар саҳнаи театр якчанд нақшҳои ҷолиб бозидааст. Дар 30 спектакли операвӣ нақш офаридааст.
Манбаъ: АМИТ Ховар
Нет комментариев