Аз 20 то 27 сентябри соли равон дар шаҳри Бокуи Ҷумҳурии Озарбойҷон 32-юмин Чемпионати ҷаҳон оид ба дзюдо баргузор мешавад.
Тавре ба хабарнигори АМИТ «Ховар» аз Кумитаи миллии олимпии Тоҷикистон хабар доданд, барои ширкат дар мусобиқа 815 нафар варзишгарон аз 131 кишвар дархост пешниҳод кардаанд. Аз ҷумҳурии мо барои иштирок дар мусобиқаи рақами 1-и дзюдои ҷаҳон 10 нафар номнавис шудаанд:
Вазни -60 кг
Боқиев Суҳроб
Вазни -66 кг
Боқиев Ёқубҷон
Вазни -73 кг
Хоҷазода Беҳрӯз
Маҳмадбеков Сомон
Вазни -81 кг
Муродов Акмал
Вазни -90 кг
Устопириён Комроншоҳ
Вазни -100 кг
Саидов Саидҷалол
Вазни +100 кг
Мирмамадов Шакармамад
Раҳимов Темур
Вазни -57 кг миёни бонувон
Қаландарова Шоҳида
Ёдовар мешавем, ки дар чемпионати ҷаҳон варзишгарон баландтарин холҳои олимпиро сазовор мешаванд. Ғолибони ҷои аввали чемпионат соҳиби 2000 хол, ҷои дуюм 1400 хол ва ҷои сеюм соҳиби 1000 хол мегарданд.
Хотиррасон менамоем, ки Ҷумҳурии Тоҷикистон аз Чемпионати ҷаҳон оид ба дзюдо миёни калонсолон ҳамагӣ як медал дорад. Ҷоизадори Бозиҳои олимпии Пекин-2008 Расул Боқиев дар Чемпионати ҷаҳон-2007 дар шаҳри Рио-де-Жанейрои Бразилия дар вазни -73 кг медали биринҷӣ ба даст оварда буд.
Нет комментариев