Варзишгарони тоҷик аз Чемпионати Осиё оид ба бокс бо 11 медал ба Ватан баргаштанд. Дар ин хусус ба АМИТ “Ховар” дар Маркази таҳлил ва иттилооти Дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.
Варзишгаронро дар Фурудгоҳи байналмилалии шаҳри Душанбе роҳбарияти Кумитаи кор бо ҷавонон ва варзиш, Мақомоти иҷроияи ҳокимияти давлатии шаҳри Душанбе, Федератсияи бокси Тоҷикистон ва дигар масъулони соҳаи варзиши мамлакат истиқбол гирифтанд.
Масъулони соҳа парчамбардоронро аз номи Ҳукумати Ҷумҳурии Тоҷикистон бо медалҳои бадастоварда табрику муборакбод намуда, барояшон дар мусобиқаҳои минбаъда барору зафар таманно карданд.
Ёдовар мешавем, ки варзишгарони тоҷик дар Чемпионати Осиё оид ба бокс байни наврасон ва мактаббачагон, ки дар шаҳри Ал-Айни Амороти Муттаҳидаи Араб баргузор гардид, соҳиби 11 медал (4 тилло, 1 нуқра ва 6 биринҷӣ) гардиданд.
Мусобиқа аз 27 август то 10 сентябр баргузор гардида, дар он байни мактаббачаҳо аз Тоҷикистон Анӯшервон Сиддиқов (33 кг) ва Акбарҷон Абдуллоев (58 кг) ба гирифтани медали тилло шарафёб шуданд. Инчунин Дилшод Сиҷаев (35 кг) медали биринҷӣ ва Фирӯзҷон Бойматов (37 кг) медали нуқра ба даст оварданд.
Байни наврасон Фариноз Абдуллоева (54 кг) ва Билолҷон Иксанов (54 кг) медалҳои тиллоро соҳиб шуданд. Мино Азамзода (60 кг), Амирбек Маҳрамов (52 кг), Абубакр Азизов (57 кг), Сорбон Нурализода (66 кг) ва Умарҷон Асроров (63 кг) медалҳои биринҷӣ ба даст оварданд.
Федератсияи бокси Тоҷикистон ба ин чемпионат ҳайати мукаммал иборат аз 27 нафарро (14 муштзан байни мактаббачаҳо ва 13 муштзан байни наврасон) равон намуд.
Дар ин чемпионат байни мактаббачагон 149 варзишгар аз 24 давлат иштирок намуданд.
Манбаъ: АМИТ «Ховар»
Нет комментариев