Дар Қасри тенниси шаҳри Душанбе маросими кушодашавии 6-ум мусобиқаи байналмилалӣ оид ба ҷудо барои дарёфти Ҷоми Президенти Тоҷикистон баргузор шуд.
Нахуст ҳайати дастаҳо – Қазоқистон, Қирғизистон, Ӯзбекистон, Туркманистон ва Тоҷикистон муаррифӣ гардиданд. Сипас, Дилшод Назаров – муовини раиси Кумитаи кор бо ҷавонон ва варзиш, Парвиз Норов – ноиби раиси Федератсияи ҷудои Тоҷикистон меҳмононро хайрамақдам гуфта, ба паҳлавонон муваффақият таманно карданд.
Қайд гардид, ки мусобиқа маротибаи шашум аст, ки бо дастгирии бевоситаи Асосгузори сулҳу ваҳдати миллӣ – Пешвои миллат, Президенти ҷумҳурӣ, Президенти Кумитаи миллии олимпии Тоҷикистон, муҳтарам Эмомалӣ Раҳмон бо иштироки паҳлавонони тоҷик ва варзишгарони кишварҳои хориҷ дар сатҳи баланд баргузор мешавад.
Мақсад аз баргузории чорабинӣ рушди намуди ҷудо дар кишвар ва муаррифии Тоҷикистон дар сатҳи байналмилалӣ мебошад. 6-умин мусобиқаи байналмилалӣ оид ба ҷудо барои дарёфти Ҷоми Президенти Тоҷикистонро Дилшод Назаров расман кушода эълон кард.
Дар рӯзи аввал қувваозмоиҳои даври муқаддамотӣ дар вазнҳои -60 ва -66 кг баргузор шуд. Дар вазни -60 кг Фаррух Ҳалимов аз Тоҷикистон ва Достон Рӯзиев аз Ӯзбекистон ба финал роҳ ёфтанд. Варзишгарони Тоҷикистон Фаррух Раҳимзода, Аъзамҷон Аъзамҷонов ва варзишгарони Ӯзбекистон Асрор Очилов, Фарид Амруллоев барои медалҳои биринҷӣ муборизаро идома медиҳанд.
Дар вазни -66 кг Ёқубҷон Боқиев аз Тоҷикистон ва Абдуҷалил Юсупов аз Ӯзбекистон барои медали тилло қувва месанҷанд. Барои медалҳои биринҷӣ ҷуфти Иброҳим Алиев/Ҷамолиддин Абдуллоев (ҳар ду аз Тоҷикистон) ва Абилҳайр Мавленин (Қазоқистон)/Нуроншо Бодомаев (Тоҷикистон) талош мекунанд.
Тибқи муқаррароти мусобиқа қувваозмоиҳои даври финалии ҳамаи вазнҳо 5 октябр баргузор мешавад. Рӯзи гузашта, 3-юми октябр, рақобатҳо дар вазнҳои -73, -81 кг идома ёфтанд.
Манбаъ: Варзиш ТВ
Нет комментариев