Бахшида ба 35-солагии Истиқлолияти давлатии Ҷумҳурии Тоҷикистон дар вилояти Суғд бунёди бинои иловагии Маркази саратоншиносӣ, Маркази клиникавии эндокринологӣ ва Беморхонаи клиникавии бачагона идома дорад. Дар ин хусус ба АМИТ «Ховар» дар хадамоти матбуоти Раиси вилояти Суғд хабар доданд.
Бинои иловагии Маркази саратоншиносии вилоят аз 6 ошёна иборат буда, дар он ҳуҷраҳо барои 150 кат, шуъбаҳои эҳё ва ҷарроҳӣ ҷойгир мешаванд. Ин марказ ба сокинони 18 шаҳру ноҳияи вилояти Суғд хизмат мерасонад.
Дар бинои иловагии Маркази клиникавии эндокринологӣ ҳуҷраҳо барои 120 кат бо тамоми шароит сохта мешаванд.
Бинои иловагии Беморхонаи клиникавии бачагонаи вилоятӣ низ барои 120 кат пешбинӣ гардида, аз ҳафт ошёна иборат аст.
Ёдовар мешавем, ки Беморхонаи клиникавии бачагона аз калонтарин беморхонаҳо дар вилояти Суғд буда, дорои 12 шуъбаи махсусгардонидаи ташхисию табобатӣ ва 290 кат мебошад. Дар он 52 табиб ва 135 корманди миёнаи тиб фаъолият дошта, ба кӯдакон хизмати тиббӣ мерасонанд.
Манбаъ: АМИТ Ховар
Нет комментариев