Дар майдони “Ситораҳои Хуҷанд”-и маркази вилоят бо иштироки Раиси вилояти Суғд Раҷаббой Аҳмадзода ҷамъомади тантанавӣ баргузор гардид ва ғолибони даври сеюми мусобиқаи меҳнатӣ дар мавсими имсолаи ҷамъоварии пахта муайян гардиданд.
Ёдовар мешавем, ки бо мақсади беталаф ҷамъоварӣ намудани ҳосили пахта тибқи қарори Раиси вилоят байни шаҳру навоҳии пахтакор мусобиқаи меҳнатӣ роҳандозӣ гардида, он ҳар 20-рӯза натиҷагирӣ карда шуд. То ба имрӯз ғолибони бистрӯзаи аввал ва дуюм бо мукофотпулиҳо қадршиносӣ шуда буданд.
Дар даври ниҳоии мусобиқаи меҳнатӣ ва бистрӯзаи сеюм мутобиқи қарори якҷояи Сарраёсати кишоварзӣ ва кумитаи иттифоқи касабаи коркунони комплекси агросаноатии вилоят ноҳияи Зафаробод ҷойи аввал ва ноҳияи Ашт ҷои дуюмро ишғол намуданд. Дар ин давраи озмун миёни ҷамоатҳои пахтакор Ҷамоати деҳоти Равшани ноҳияи Зафаробод ғолиб дониста шуд.
Ба ғолибони даври ниҳоӣ аз ҷониби Раиси вилоят Раҷаббой Аҳмадзода мукофотҳои пулӣ мутаносибан дар ҳаҷми 20 ҳазор сомонӣ, 10 ҳазор сомонӣ ва 5 ҳазор сомонӣ тақдим гардид.
Ҳамзамон роҳбарони як қатор хоҷагиҳои пешқадами шаҳру навоҳии пахтакор ва механизаторон бо мукофотпулиҳо сарфароз гардонида шуданд.
Раиси вилоят зимни суханронии худ ғолибони мусобиқаи меҳнатиро табрик гуфта, иброз дошт, ки соли равон дар вилояти Суғд майдони кишти пахта ба 57 ҳазору 194 гектар расонида шуд, ки нисбати соли гузашта 6 ҳазор гектар зиёд мебошад. Кишоварзони вилоят азм доранд соли ҷорӣ нақшаи пешбинишударо барзиёд ва наздик 130 000 тонна пахта ҷамъоварӣ намоянд. То ба санаи 14-уми ноябр бошад беш аз 100 000 тонна пахта ҷамъоварӣ ва нақшаи муайянгардида 101 дарсад иҷро шудааст.
Изҳори боварӣ карда шуд, ки масъулини соҳаи кишоварзӣ ва роҳбарони хоҷагиҳои деҳқонӣ пахтаи боқимондаро пурра ҷамъоварӣ карда, уҳдадориҳои худро иҷро менамоянд.
Манбаъ: Хадамоти матбуоти Раиси вилояти Суғд
Нет комментариев