Дар Кохи фарҳангии «Истиқлол»-и шаҳри Гулистон ба ифтихори Рӯзи Президенти Ҷумҳурии Тоҷикистон бо иштироки омӯзгорон, донишҷӯёни коллеҷи тиббӣ, мактабиён, аъзои ТҶҶ «Созандагони Ватан» ва ҷавонони фаъоли шаҳр дар мавзӯи «Нақши Президенти Ҷумҳурии Тоҷикистон муҳтарам Эмомалӣ Раҳмон дар таҳкими сулҳу ваҳдат ва рушди устувори мамлакат» ҳамоиш баргузор гардид.
Муслимахон Ҷамолиён, раиси КИ ҲХДТ дар шаҳри Гулистон конфронсро ифтитоҳ намуда, иброз дошт, ки Президенти Ҷумҳурии Тоҷикистон муҳтарам Эмомалӣ Раҳмон миллатро аз парокандагӣ ва давлатро аз маҳвшавӣ наҷот дода, кохи муҳташами сулҳи тоҷиконро эъмор карда, низоми давлатдории муосири халқро асос гузошта, қобилияти ҳуқуқии давлатдории халқро эҳё намуда, дар заминаи ин кӯшишҳо ҳаққи таърихии миллатро ба давлати мустақил эълон ва татбиқ сохта, тоҷиконро ҳамчун миллати дорои забон, фарҳанг ва таърихи қадима ба ҷаҳониён муаррифӣ ва дар навбати худ давлати Тоҷикистонро ҳамчун давлати мустақил, дунявӣ, демократӣ ва ҳуқуқбунёд дар байни халқу миллатҳои соҳибдавлат ҳамроҳ намуда, ҷиҳати қадршиносии ҳамаи корҳои неку писандидаи қаҳрамонони миллат шароити мусоид фароҳам оварданд.
Сипас, дар ҳамоиш мудири шуъбаи рушди иҷтимоӣ ва робита бо ҷомеаи дастгоҳи раиси шаҳр Илҳом Мадализода дар мавзӯи «Президент — раҳнамои миллат», омӯзгори фанни таърихи Коллеҷи тиббии шаҳр Зебуниссо Абдуҷабборова дар мавзӯи «Пешвои миллат – бунёдгузори давлати миллӣ», директори Маркази дарёфт ва рушди истеъдодҳои шуъбаи маорифи шаҳр Аҳлиддин Абдураҳмонов дар мавзӯи «Ҷавонон-ояндаи давлату миллатанд», раиси кумиҷроия Муслимахон Ҷамолиён дар мавзӯи «Нақши Президенти Ҷумҳурии Тоҷикистон Эмомалӣ Раҳмон дар таҳкими сулҳу Ваҳдат ва рушди устувори мамлакат» маърӯза карданд.
Манбаъ: Хадамоти матбуоти Раиси вилояти Суғд
Нет комментариев