Дирӯз дар толори Кохи фарҳанги “Суғдиён”-и шаҳри Хуҷанд мулоқоти раиси шаҳри Хуҷанд Маъруф Муҳаммадзода бо донишҷўёни муассисаҳои таҳсилоти олӣ ва касбии маркази вилоят баргузор гардид.
Олимҷон Мирмуҳаммадов, намояндаи Мақомоти иҷроияи ҳокимияти давлатии вилояти Суғд вохӯриро ифтитоҳ намуда, зикр дошт, ки мулоқоти мазкур бо дастури Раиси вилояти Суғд Раҷаббой Аҳмадзода амалӣ шуда истодааст ва ҳадафи он бохабар шудан аз вазъи иҷтимоии донишҷӯён ва шунидани дархосту пешниҳодоти онҳо мебошад.
Раиси шаҳри Хуҷанд Маъруф Муҳаммадзода дар оғози суханронии худ доир ба тадбирҳои Мақомоти иҷроияи ҳокимияти давлатии шаҳри Хуҷанд ҷиҳати бо дастовардҳои арзанда истиқбол намудани ҷашни 30-солагии Истиқлолияти давлатии Ҷумҳурии Тоҷикистон иттилоъ дода, аз ҷумла афзуд, ки шаҳрдорӣ аз тамоми имконоту васила истифода намуда, нақша — чорабиниҳои тасдиқшударо ки бунёд ва азнавсозии беш аз 510 иншооти таъиноташ гуногунро ташкил медиҳад, амалӣ намуда истодааст.
Раиси шаҳр гуфт, ки ҷавонони сарбаланди кишвар дастуру ҳидоятҳои хирадмандонаи Пешвои миллат муҳтарам Эмомалӣ Раҳмонро, ки аз Паёмашон ба Маҷлиси Олӣ бармеояд, бо ҳисси баланди масъулият иҷро намуда, дар пешрафти ҷомеа саҳми арзанда мегузоред.
Маъруф Муҳаммадзода аз дастгирии доимии давлату Ҳукумат ёдовар шуда, таъкид дошт, ки имрӯз барои касбу илмомӯзии ҷавонон шароитҳои зарурӣ фароҳам оварда шудааст. Соли ҷорӣ аз шаҳри Хуҷанд тариқи маркази Маркази миллии тестии назди Президенти Ҷумҳурии Тоҷикистон 1247 нафар ба муассисаҳои таҳсилоти олии касбӣ ва 207 нафар ба муассисаҳои миёнаи касбӣ (коллеҷ) ва тибқи озмун дар муассисаҳои олии хориҷи кишвар 385 нафар дохил шуданд, ки маҷмуъан ин 81,6 фисади хатмкунандагони макотиби миёнаи шаҳрро ташкил медиҳад.
Сипас донишҷӯён бо пешниҳодоти судманд ба раиси шаҳри Хуҷанд муроҷиат намуда, посухҳои қаноатбахш гирифтанд.
Барномаи фарҳангии фарогири мавзуъоти ватандӯстона табъи ҳозиринро болида намуд.
Манбаъ: Хадамоти матбуоти Раиси вилояти Суғд
Нет комментариев