Рақобатҳои даври гурӯҳии Ҷоми Осиё-2019, ки дар кишвари Амороти Муттаҳидаи Араб ҷараён дорад, дирӯз хотима ёфтанд. Иштирокчиёни гурӯҳи охирини мусобиқот бозиҳои даври сеюмро доир карданд. Дар ҷараёни он мунтахабҳои Ҷопон бо Ӯзбекистон ва Умон бо Туркманистон андари майдони рақобат шуданд.
Яке аз бозиҳои марказии даври гурӯҳӣ миёни ду тими пешсафи гурӯҳи “F” мунтахабҳои Ҷопон ва Ӯзбекистон дар варзишгоҳи “Шайх Халифа”-и Ал-Айн сурат гирифта бо ҳисоби 2-1 ба фоидаи ҷопониҳо хотима ёфт. Ҳисобро дар дақиқаи 40-уми бозӣ ҳамлагари мунтахаби Ӯзбекистон Элдор Шомурод кушод. Ҷопониҳо баъд аз се дақиқа ба голи ӯзбекҳо ҷавоб гардониданд. Йосинори Муто партофти ҳамдастааш Мурояро ба гол табдил дод.
Баъд аз танаффус бартариро “самурайҳо” ба даст гирифта ба задани голи дуюм даст ёфтанд. Сикоси Суатани муаллифи голи дуюми ҷопониҳо шуд. Ҳамин тавр пас аз ин пирӯзӣ намояндагони кишвари “тулуи офтоб” бо соҳиб шудани 9 имтиёз ба гирифтани зинаи аввали гурӯҳ даст ёфтанд. Ӯзбекистон бо 6 имтиёз зинаи дуюмро ишғол кард.
Умон, ки дар бозии дигари ин гурӯҳ мунтахаби Туркманистонро бо ҳисоби 3-1 шикаст дод, иштирокчии 15-уми плей-оффи Ҷоми Осиё-2019 гардид.
Манбаъ: Сомонаи ТВ Варзиш
Нет комментариев