Дар Кохи фарҳанги «Суғдиён»-и маркази вилоят вохӯрии Раиси вилояти Суғд Раҷаббой Аҳмадзода бо ҷавонон ва варзишгарони вилоят баргузор гардид, ки дар он масъулини соҳа, ҷавонони фаъол, варзишгарону собиқадорон ширкат варзиданд.
Раиси вилоят Раҷаббой Аҳмадзода зимни суханронии хеш аз дастовардҳо ва натиҷаҳои илмиву варзишии ҷавонон дар соли 2018 натиҷагирӣ намуда, дар самти вусъати татбиқи барномаҳои соҳавӣ, дастгирии иҷтимоию иқтисодии ҷавонон, тарғиби тарзи ҳаёти солим, баргузор намудани чорабиниҳои фарҳангӣ, оммавӣ ва варзишӣ ва ғайраҳо вазифаҳои мушаххас гузошт.
Тавре таъкид карда шуд, тибқи нақшаи тақвими ягонаи чорабиниҳои варзишӣ, оммавӣ, солимгардонӣ соли 2018-ум дар мусобиқаҳои ҷумҳуриявӣ ва байналмилалӣ аз рӯи намудҳои олимпӣ ва ғайриолимпӣ беш аз 2360 нафар варзишгарони вилоят соҳиби ҷойҳои якум, дуюм ва сеюм шуданд.
Бо дастгирии Мақомоти иҷроияи ҳокимияти давлатии вилоят Клуби футболи “Хуҷанд” дар мавсими соли 2018 маҳорати баланди касбӣ нишон дода, аз байни ҳашт дастаи лигаи олии кишвар мақоми дуюмро касб ва роҳхати даври интихобии Ҷоми Конфедератсияи футболи Осиёро ба даст овард. Ҳамзамон, ҳайати дастаи ҷавонон пас аз солҳои тӯлонӣ сазовори мақоми сеюм гардида, ҳаводорону дӯстдорони ин риштаи варзишро рӯҳбаланд намуданд.
Имрӯз бо ифтихор номи варзишгарони вилоят Комроншоҳи Устопириён, Ҷаҳон Қурбонов, Абдусаттор Ғафуров, Муҳаммадалӣ Абдураҳмонов, Муҳриддин Ҳасанов, Ҳамроз Раҷабов, Маҳмад Миров, Ҷамшед Қодиров ва даҳҳо дигаронро ба забон овардан мумкин аст, ки шарафи варзиши тоҷикро дар миқёси байналмилалӣ баланд бардошта, Парчами Тоҷикистони азизро дар толору майдонҳои бузурги варзишии кишварҳои мухталифи дунё парафшон карданд.
Зикр гардид, ки Мақомоти иҷроияи ҳокимияти давлатии вилоят ҷиҳати рушди соҳаи варзиш тамоми шароитҳои заруриро фароҳам меоварад. Бо қарори Раиси вилоят аз 2 октябри соли 2017 Нақшаи чорабиниҳои «Барномаи маҳаллии маҷмӯии рушди тарбияи ҷисмонӣ ва варзиш дар вилояти Суғд барои солҳои 2017-2021» ба тасвиб расида, ҳамзамон, «Барномаи рушди футбол дар вилояти Суғд барои солҳои 2017-2021» мавриди амал қарор дорад.
Таъсиси Стипендияи Раиси вилоят барои 53 нафар варзишгарони беҳтарини вилоят, қадршиносии варзишгарон, иштироки дастаҳои футболи вилоят дар лигаи олӣ ва лигаи якуми мамлакат, гузаронидани беш аз 1090 мусобиқаи вилоятию минтақавӣ ва маҳаллӣ, таъмини иштироки дастаҳои мунтахаби вилоят дар чемпионатҳои ҷумҳурӣ ва мусобиқаҳои байналмилалию ҷаҳонӣ шаҳодати татбиқи бомароми қарорҳои зикршуда мебошад.
Пас аз дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни мулоқот бо варзишгарон давоми соли 2018 дар шаҳру ноҳияҳои вилоят беш аз 105 иншооти варзишӣ аз ҷумла, 77 майдонча, 19 толор, 1 ҳавзи шиноварӣ, 1 маҷмаа ва 7 майдонча барои бозии кӯдакон бо сарфи беш аз сиву се миллион сомонӣ аз ҳисоби маблағҳои буҷетӣ ва ҷалби сарпарастон сохта, ба истифода дода шуданд.
— Маҳз, сиёсати хирадмандона ва дастгирию пуштибонии Пешвои миллат муҳтарам Эмомалӣ Раҳмон нисбати варзиш ва варзишгарон имконият фароҳам овард, ки варзишгарони мо дар арсаи ҷаҳонӣ мақом ва манзалати хосае касб намоянд. Онҳо дар мусобиқаю чемпионатҳои байналмилалӣ, осиёӣ ва ҷаҳонӣ бо маҳорати касбӣ қувваозмоӣ намуда, медалу ҷоиза ва унвонҳои баландро соҳиб шуданд, — зикр дошт Раиси вилоят.
Раҷаббой Аҳмадзода масъулини соҳа, аз ҷумла раисони шаҳру ноҳияҳо, раёсатҳои кор бо ҷавонон ва варзиш, маорифи вилоят ва роҳбарони муассисаҳои таҳсилоти олӣ ва миёнаи махсусро бобати иҷрои саривақтии Барномаи таъмиру барқарорсозӣ ва сохтмони иншоотҳои варзишӣ дар вилояти Суғд барои солҳои 2018-2020, ҷиҳати оммавигардонии варзиш ва тарғиби тарзи ҳаёти солим вазифадор намуд.
Дар вохӯрӣ ҷавонони фаъол, варзишгарони муваффақ, ғолибони мусобиқаҳои байналмилалӣ ва собиқадорони соҳа бо ҷоиза ва мукофотҳои пулии Раиси вилояти Суғд қадршиносӣ гардиданд.
Барномаи пурмӯҳтавои фарҳангӣ ба чорабинӣ ҳусни анҷом бахшид.
Манбаъ: Хадамоти матбуоти Раиси вилояти Суғд
Нет комментариев