Раиси вилояти Суғд Раҷаббой Аҳмадзода ва Раиси шаҳри Хуҷанд Маъруф Муҳаммадзода дар маҳаллаи 30-юми шаҳри Хуҷанд аз раванди бунёди коргоҳи равғанбарории ширкати «Зирвеко» ошноӣ пайдо намуданд.
Иттилоъ дода шуд, ки коргоҳи равғанбарорӣ бо истифода аз технологияи муосири ҷаҳонӣ истеҳсоли давлатҳои Чин ва Италия сохта шудааст ва аз маҳсулоти равғани хом маҳсулоти баландсифати ҷавобгӯ ба талаботи меъёрҳои стандартӣ омода менамояд. Зимни истеҳсоли равған он ба воситаи дастгоҳҳо аз якчанд марҳила гузашта полоиш меёбад ва дар натиҷа равғани баландсифат омода карда мешавад.Равғани истеҳсолшаванда ба саломатии инсон безарар буда, тозаву хушбӯй мешавад. Иқтидори истеҳсоли коргоҳи мазкур дар як шабонарӯз 30 тонна буда, он асосан равғани хоми пахта, рапс, зағир ва дигар зироатҳои равғандеҳи истеҳсоли хориҷиро бо сифати баланд коркард намуда, ба харидорон пешниҳод менамояд. Технологияи воридгардида дар Осиёи Марказӣ назир надошта, 26-умин коргоҳи муосири равғанбарорӣ дар ҷаҳон арзёбӣ мегардад.
Раиси вилояти Суғд Раҷаббой Аҳмадзода аз ин иқдоми соҳибкори ватанӣ изҳори сипосмандӣ намуда, ба он баҳои баланд дод.Ҳамзамон дастур дода шуд, ки ҷиҳати афзун намудани шумораи коргарон, беҳтар намудани шароити корӣ, сабзу хуррамгардонии атрофии коргоҳ тадбирҳо андешида шаванд.
Манбаъ: Дафтари матбуоти Раиси шаҳри Хуҷанд
Нет комментариев