Дар Кохи фарҳанги ба номи Абӯабдуллоҳи Рӯдакии маркази вилоят мулоқоти Раиси вилояти Суғд Раҷаббой Аҳмадзода бо кормандони соҳаи саноат ва соҳибкорони вилоят баргузор гардид.
Дар мулоқот муовинони Раиси вилоят, раисони шаҳру навоҳии вилоят, роҳбарони сохторҳои давлатӣ, кормандони соҳаи саноат ва соҳибкорон ширкат варзиданд.
Раиси вилоят Раҷаббой Аҳмадзода дар ин чорабинӣ суханронӣ карда, вазъи соҳаи саноати вилоят ва фаъолияти соҳибкоронро таҳлилу баррасӣ намуд ва бобати тавсеаи дастовардҳо, бунёди корхонаҳои нави истеҳсолӣ, бештар ба роҳ мондани содироти маҳсулот, таъсиси ҷойҳои нави корӣ ва ҳалли масоили ҷойдошта масъулинро вазифадор намуд.
— Масъулони соҳа ва саноатчиёни вилоят иқдоми наҷиби Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро бобати эълон намудани саноатикунонии босуръати иқтисодиёти миллӣ – ҳамчун ҳадафи стратегии чоруми кишвар бо хушнудии том истиқбол гирифтанд, — зикр намуд дар оғоз Раҷаббой Аҳмадзода.
Воқеан ҳам дар вилояти Суғд иқтидорҳои бузурги саноатӣ, теъдоди зиёди соҳибкорони ташаббускору навовар, инфрасохтори зарурӣ ва захираҳои фаровон мавҷуданд.
Дар ҷамъбасти соли 2018 шумораи соҳибкорони вилояти Суғд беш аз 105 ҳазор нафарро ташкил дод, ки нисбат ба соли 2017-ум 5997 нафар зиёд мебошад.
Дар мулоқот зикр гардид, ки кормандони соҳаи саноат дар ҳамбастагӣ бо сохторҳои дахлдори вилоятӣ ва мақомоти иҷроияи ҳокимияти давлатии шаҳру ноҳияҳо баҳри иҷрои дастуру супоришҳои Пешвои миллат муҳтарам Эмомалӣ Раҳмон ҷиҳати таҳкими нуфузи вилоят ҳамчун минтақаи саноатии мамлакат, ба кор андохтани иқтидорҳои нав, роҳандозии истеҳсоли маҳсулоти нави рақобатноку воридотивазкунанда як силсила тадбирҳои судмандро амалӣ намуданд.
Дар натиҷа, ба таъсири омилҳои манфии берунӣ нигоҳ накарда, ҳаҷми истеҳсоли маҳсулоти саноатӣ ба маблағи 11,3 миллиард сомонӣ расонида шуд, ки бо нархҳои амалкунанда нисбат ба соли 2017 1,1 миллиард сомонӣ зиёд буда, 110,5 фоизро ташкил медиҳад. Суръати рушди саноати вилоят ба 108,2 фоиз баробар гардид.
Дар соли 2018 аз 603 корхонаи саноатӣ 530 корхона ё 87,9 фоиз фаъолият бурданд. Мутаассифона, 73 корхона ё 12,1 фоизи корхонаҳои вилоят фаъолият накарданд. Бояд илова намуд, ки дар ин давра шумораи корхонаҳои бефаъолият нисбат ба соли қаблӣ 2 адад кам шуда, аз ҳисоби 73 адад чунин корхонаҳо ба маблағи 61,7 млн сомонӣ маҳсулоти саноатӣ истеҳсол нагардид, ки ба 0,5 фоизи маҷмӯи маҳсулоти саноати вилоят баробар мебошад. Яъне, ин камбудӣ ба нишондиҳандаи умумии вилоят бештар таъсири сифатӣ дорад, на миқдорӣ. Бинобар он, зарур аст, ки баҳри ислоҳи он чораҳои судманд андешида шаванд.
Соли гузашта нақшаи таъсиси корхонаву коргоҳҳои нави саноатӣ барзиёд иҷро гардида, дар соҳаи саноати вилоят як қатор дастоварду равандҳои мусбӣ ба қайд гирифта шуд. Дастовардҳои мазкур имкон доданд, ки саҳми саноати вилоят дар ташаккулёбии маҷмӯи маҳсулоти саноати ҷумҳурӣ дар сатҳи 50 фоиз нигоҳ дошта шавад. Боиси қаноатмандист, ки тайи 5 соли охир саҳми саноати вилоят дар ташаккулёбии маҷмӯи маҳсулоти саноати ҷумҳурӣ аз 34 фоизи соли 2014 то 50 фоиз афзудааст, ки наздик 1,5 маротиба зиёд аст.
Умуман, ба нақша гирифта шуда буд, ки соли 2018 дар вилоят 88 корхонаву коргоҳи нави саноатӣ таъсис дода мешавад. Дар натиҷаи тадбирҳои андешидашуда 93 корхонаву коргоҳи нав ба фаъолият шурӯъ намуд, ки 1431 нафарро бо ҷойи корӣ таъмин кард.
Раванди иҷрои супориши Пешвои миллат бобати дар ҳар як шаҳру ноҳияҳо таъсис додани корхонаву коргоҳҳои дӯзандагӣ ва коркарди шир зери назорат қарор дода шудааст.
— Дар пеш моро ҷашни фархундаи миллат — 30 — солагии Истиқлолияти давлатии Ҷумҳурии Тоҷикистон интизор аст. Дар иртибот ба ин, ба нақша гирифта шудааст, ки дар шаҳру ноҳияҳои вилояти Суғд 272 корхонаву коргоҳи нави саноатӣ бо 4,9 ҳазор ҷойи нави корӣ таъсис дода мешавад. Аз ҷумла пешбинӣ мешавад, ки дар соҳаи истеҳсоли масолеҳи сохтмонӣ 69 корхонаву коргоҳи нав, саноати сабук 119, хӯрокворӣ 63, кимиё ва коркарди нафт 5, мошинсозӣ, коркарди фулузот ва электротехника 5, металҳои ранга 4 ва сӯзишворӣ 1 адад бунёд мегарданд, — таъкид дошт Раиси вилоят.
Баҳри дастгирии соҳибкороне, ки дар самти истеҳсолот фаъолият мебаранд, бо ибтикори Пешвои миллат моратория дар самти санҷишҳо барои солҳои 2019-2021 эълон карда шуд. Инчунин, баҳри дастгирии минбаъдаи соҳибкорон, дар кишварамон «300 рӯзи ислоҳот оид ба дастгирии соҳибкорӣ ва беҳтар намудани фазои сармоягузорӣ» эълон гардидааст.
Воридоти ашёи хом барои коркарди маҳсулоти ниҳоӣ бо пешниҳоди Пешвои миллат аз пардохти андоз аз арзиши иловашуда озод карда мешавад.
— Ҳамаи мо танҳо як ҳадаф дорем, ки ин ҳам бошад, ободии Ватани азизамон аст ва ман итминони комил дорам, ки дар сарҷамъиву муттаҳидӣ баҳри расидан ба ин ҳадафи наҷиб аҳлона меҳнат хоҳем кард, — зикр дошт дар фарҷоми суханронӣ Раиси вилоят.
Дар мулоқот кормандони соҳаи саноат ва соҳибкорон, аз ҷумла Раҳим Абдуллоев – соҳибкор аз ноҳияи Бобоҷон Ғафуров, директори корхонаи «Тамохуш» — и шаҳри Исфара Дилшод Расулзода, директори ширкати истеҳсолии «Барс» — и шаҳри Хуҷанд Мирзобахтиёр Мирзобаҳодуров, раиси хоҷагии деҳқонии «Муллосафар» — и ноҳияи Мастчоҳ Муллосафар Олимов, директори корхонаи истеҳсолии серсоҳаи «Кедр» Дадохон Очилов, муассиси ҶДММ «Умрон Суғд» Мавҷуда Қобилова, директори ҶДММ «Арванд» Шоира Содиқова ва дигарон ба сухан баромада, фикру андешаҳо ва пешниҳодҳои худро бобати рушди соҳаи саноати вилоят ва фаъолияти соҳибкорӣ иброз доштанд.
Манбаъ: Хадамоти матбуоти Раиси вилояти Суғд
Нет комментариев