24 апрели соли 2019 Раиси вилояти Суғд Раҷаббой Аҳмадзода бо директори генералии ҶДММ “Ширкати куҳӣ-саноатии Тоҷикистону Хитой” Ли Шен Жен мулоқот намуд.
Дар оғози мулоқот Раиси вилоят Ли Шен Женро ба муносибати директори генералии ширкат таъин шуданаш табрик карда, изҳори боварӣ намуд, ки фаъолияти “Ширкати куҳӣ-саноатии Тоҷикистону Хитой” минбаъд боз ҳам беҳтар хоҳад шуд.
Раҷаббой Аҳмадзода таъкид дошт, ки бо ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон саноатикунонии кишвар ҳадафи чоруми миллӣ эълон гардидааст ва аз ин лиҳоз дар вилоят барои афзун намудани ҳаҷми истеҳсоли маҳсулоти саноатӣ, ифтитоҳи корхонаҳои нав ва бо ҷойи корӣ таъмин намудани аҳолӣ таваҷҷуҳи хоса равона карда мешавад.
Зимни суҳбат ҳамчунин таъкид гардид, ки бояд фаъолияти корхонаи “Зарнисор”, воқеъ дар шаҳри Гулистон ва корхонаи металлургии “Ширкати куҳӣ-саноатии Тоҷикистону Хитой”, воқеъ дар шаҳри Истиқлол ҷоннок карда шуда, уҳдадориҳои ширкат таъмин карда шавад.
Ли Шен Жен дар аснои мулоқот аз густариши ҳамкориҳои дуҷониба изҳори хушнудӣ намуда, иброз дошт, ки то охири сол ширкат бо дастгирии Ҳукумати Ҷумҳурии Тоҷикистон як хатти нави истеҳсолиро фаъол ва теъдоде аз сокинони маҳаллиро бо ҷойи корӣ таъмин менамояд. Ҳамзамон барои иҷрои уҳдадориҳо, аз ҷумла бунёди кӯдакистон ва таъмири роҳи роҳи мошингарди Бӯстон-Зарнисор тадбирҳои зарурӣ андешида хоҳад шуд.
Манбаъ: Хадамоти матбуоти Раиси вилояти Суғд
Нет комментариев