Дар финали Ҷоми Испания, бошгоҳҳои “Барселона” ва “Валенсия” андари майдони рақобат шуданд. Набарди тимҳо дар шаҳри Севиля сурат гирифта, бо ҳисоби 2:1 ба суди “Валенсия” хатм шуд. Гарчанде, ки бозӣ пурра дар дастаи “нилунориҳо” буд, аммо ду аксулҳуҷуми футболбозони “Валенсия” тақдири ин бозиро ба нафъи хеш ҳаллу фасл намуданд. Дар ин вохӯрӣ голҳои “Валенсия”-ро Кевин Гамейро ва Родриго ба самар расониданд. Ягона тӯби мағлубшудагонро сарвони даста Лео Месси муаллифӣ намуд. Ҳамин тавр бошгоҳи “Валенсия” барандаи Ҷоми Испания дар соли 2019 дониста шуд. Ин фоҷиаи аввалини каталониҳо дар ин мавсим нест, чаро ки якчанд рӯз пеш бошгоҳи “Ливерпул” айши онҳоро талх намуда, аз идомаи Лигаи Чемпионҳо маҳрумашон намуда буд. Акнун баъди ин бозӣ имкони боқӣ мондани сармураббӣ – Эрнесто Валверде ва футболбозон Филипе Коутиню, Малком, Ракитич, Юмтити, Видал, Рафиния, ва Боатенг дар даста танг мешавад. “Барселона”-ро мебояд, ки якчанд футболбозони таҷрибадорро харидорӣ намояд. Дар бозӣ бар зидди “Валенсия” маълум шуд, ки танҳо як Месси рақобат мекардаасту дигарон бошанд, тамошобин. Ростӣ дар ҳайати “Барселона” пур аз футболбозони ноуҳдабро аст, ки бояд онҳоро аз даста ҷавоб дод. Хулоса “Барселона” ба тактикаи пешинаи худ, ки дар даври Гвардиола буд, сахт ниёз дорад.
Ҷоми Испания-2019. Финал
“Барселона” – “Валенсия” – 1:2
Голҳо: Гамейро 21 (0:1), Родриго 33 (0:2), Месси 73 (1:2).
Манбаъ: ТВ Варзиш
Нет комментариев