30 май Раиси вилояти Суғд Раҷаббой Аҳмадзода дар арафаи Иди саиди Фитр ба манзили истиқоматии сокини ноҳияи Бобоҷон Ғафуров, собиқадори соҳаи кишоварзӣ ва механизатори номии вилоят Аҳмадҷон Қосимов ташриф оварда, ӯро аёдат намуд.
Зимни аёдат Раиси вилоят таъкид кард, ки бо дастуру ҳидоятҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳбарияти вилоят доимо аз ҳоли собиқадорони соҳаҳои гуногуни хоҷагии халқ хабар мегирад ва ба хизмати арзандаи чунин шахсон арҷ мегузорад.
Раҷаббой Аҳмадзода ҳамчунин аз фаъолияти пурсамари Аҳмадҷон Қосимов ёдовар шуда, иброз дошт, ки кору пайкори содиқонаи чунин пирони рӯзгор барои насли ҷавон намунаи ибрат аст.
Дар навбати худ Механизатори хизматнишондодаи Ҷумҳурии Тоҷикистон Аҳмадҷон Қосимов аз таваҷҷуҳи доимии роҳбарияти мамлакат изҳори хушнудӣ намуда, барои ободиву шукуфоии Тоҷикистони соҳибистиқлол дасти дуо бардошт.
Ёдовар бояд шуд, ки Аҳмадҷон Қосимов солҳои тӯлонӣ дар вазифаи мудири участкаи Унҷӣ фаъолият бурда, ҳамчун кишоварзи ботадбир барои фаровонии ҳосил ва серию пурии дастархони мардум ҳиссаи назаррас гузоштааст ва ҳамчун устоди пахта бо ордену мукофотҳои давлатӣ кадрдонӣ карда шудааст.
Манбаъ: Хадамоти матбуоти Раиси вилояти Суғд
Нет комментариев