Раиси вилояти Суғд Абдураҳмон Қодирӣ намояндагони дафтари САҲА дар шаҳри Хуҷандро бо роҳбарии Шон Мак Гриви, мутахассиси аршади иҷроия ва ҳамоҳангсози барномаҳои САҲА дар Тоҷикистон ба ҳузур пазируфт.
Раиси вилояти Суғд Абдураҳмон Қодирӣ зимни сӯҳбат аз ҳамкориҳои самараноки Мақомоти иҷроияи ҳокимияти давлатии вилоят бо ин созмони ҷаҳонӣ ёдоварӣ намуда, барои вусъати ҳамкориҳо изҳори омодагӣ намуд.
Абдураҳмон Қодирӣ инчунин ба меҳмонон доир ба таҳаввулоти назарраси вилояти Суғд дар чанд соли охир маълумот дода, таъкид бар он намуд, ки ҳоло дар вилоят марҳилаи нави бунёдкориву созандагӣ оғоз ёфтааст. Дар ин замина аз таҷдиди хоҷагиҳои калонҳаҷми кишоварзӣ, эҳёи ҳунарҳои мардумӣ, навсозии муассисаҳои фарҳангӣ, ободсозии роҳҳо ва вусъати корҳои бунёдкорӣ дар шаҳраки ояндаи Сайҳун ёдоварӣ шуд.
Дар аснои сӯҳбат Шон Мак Гриви роҳбари нави дафтари САҲА дар Хуҷанд – Шанджив Тиручелвамро муаррифӣ намуд. Тавре таъкид гардид, Мақомоти иҷроияи ҳокимияти давлатии вилояти Суғд бо ин созмони ҷаҳонӣ ҳамкориҳои хуб дорад ва роҳбари навтаъиншуда низ барои вусъати ҳамкориҳо аз малака ва таҷрибаи худ истифода хоҳад бурд.
Дар фароварди сӯҳбат ҷонибҳо барои густариши ҳамкориҳо дар самтҳои мухталиф изҳори омодагӣ намуданд.
Дар ин бора sugd.tj хабар медиҳад.
Нет комментариев