Имрӯзҳо дар бозору мағозаҳо мо имконияти дастрас намудани хамираҳои сафедкунандаи дандонҳоро дорем, ки мансуби ширкатҳои номдор «Сплет профессионал, Колгейт, Новый жемчуг, Бленд-а-мед, Аквафреш, Силка» ҳастанд. Хамираҳои баёнгардида дорои сифати баланд буда, барои сафед гардидани дандонҳо мусоидат мекунанд.

Хамираҳои сафедкунандаи дандон ба ду гурӯҳ ҷудо мешаванд. Гурӯҳи якумро хамираҳое ташкил медиҳанд, ки ба сири дандон сахт таъсир мерасонанд. Ҳангоми харидорӣ  намудани хамираҳои  сафедкунандаи  дандон  ба  нишондоди ЭР-Д-А аҳамият диҳед. Ин нишондод  ҳаҷми зарраҳои майдаро, ки  пардаи тунук (налёт) ва санги дандонро  барҳам медиҳад,  инъикос менамояд. Агар дар хамираҳо навиштаҷоти нишондоди бештар аз 100 ЭР-Д-А  бошад, онҳо ба сири дандон зарар меоваранд. Нишондоди мазкур набояд аз 80 воҳид зиёдро ташкил диҳад. Ҳангоми харидорӣ намудани гурӯҳи дуюми хамираҳои сафедкунандаи дандон эҳтиёт шавед, зеро дар таркиби онҳо перекиси водород мавҷуд аст. Ин намуд хамираҳо дандонҳоро хуб сафед мекунанд, лек ба милк зиён расонида, сири дандонро мулоим ва тунук карданашон мумкин аст. Онҳо ҳатто метавонанд ранги дандонро тағйир диҳанд. Агар дар таркиби хамира хлорид стронций ва ситрати натрий мавҷуд бошад, донед, ки ин хамира босифат аст. Моддаҳои зикргардида асабҳои дандонро муҳофизат намуда, аз таъсири ангезандаи беруна нигоҳ медоранд. Ғайр аз ин, агар дар таркиби хамираи сафедкунандаи дандон натрии фторӣ мавҷуд бошад, беҳтар аст. Ин модда сири дандонро мустаҳкам намуда, ба пайдошавии доғҳои кариозӣ монеъгӣ мекунанд.

Чунин савол ба миён меояд: Оё бо ёрии хамираҳо дандонҳоро сафед кардан мумкин аст?

Бале, агар Шумо хамираи сафедкунии дандон ва чӯткаи мувофиқро интихоб намоед, пас метавонед аз доғҳои сиёҳи чой, қаҳва ва тамоку халосӣ ёфта, дорои дандонҳои сафед гардед. Истифодабарии мунтазами хамираҳо боиси пайдо нагаштани санги дандон шуда метавонад. Ба ҳар ҳол пеш аз истифодабарии хамираи сафедкунандаи дандон, Шумо бояд аз пизишки дандон маслиҳат гиред. Агар сири дандонатон тунук ё ба бемории милки дандон бо номи «стоматит» гирифтор шуда бошед, пас таркиби сахттаъсири хамираи сафедкунандаи дандон зарар оварданаш мумкин аст. Дар ин ҳолат Шумо метавонед аз хамираи сафедкунандаи дандон, ки дар таркиб папаин ва бромелаин дорад, истифода баред.

Якчанд маслиҳатҳоро оид ба нигоҳубини дандонҳо Бодиққат бошед!

1. Шумо метавонед дандонҳои худро бо сода тоза кунед. Дар хотир доред, ки содаро танҳо як маротиба дар ҳафта истифода бурдан мумкин асту халос.
2. Барои сафедкунии дандонҳоятон метавонед аз донаҳои қулфинай истифода баред. Кулфинайро то баромадани афшурааш ба рӯи дандонҳоятон молед. Пас даҳонатонро бо об чайқонед.
3. Агар даҳонатон «стоматит» шуда бошад, камтар содаро ба оби гарм тар намуда, баъди ҳарорати мӯътадилро гирифтанаш, даҳонро чайқонед. Афшураи карам низ ба дарди даҳон шифо мебахшад. Ба ҳар ҳол маслиҳати пизишконро, албатта, гиред.