Прокурори генералии Тоҷикистон Юсуф Раҳмон имрӯз зимни нишасти матбуотӣ дар шаҳри Душанбе эълон кард, ки дар иртибот ба ҳодисаи заҳролудшавии 14 нафар маҳбусон парвандаи ҷиноятӣ кушода шудааст, ки аз рӯи он Прокуратураи ҳарбии Тоҷикистон тафтиш мебарад. Дар ин бора хабарнигори АМИТ «Ховар» иттилоъ дод.
«Тибқи маълумотҳои пешакӣ ва хулосаи ташхиси тиббӣ марги 14 нафар маҳбус дар натиҷаи заҳролудшавӣ ба миён омадааст», — изҳор дошт ӯ.
«Айни ҳол мо муайян карда истодаем, ки онҳо аз кадом намуди заҳр заҳролуд шуданд. Мувофиқи маводҳои парвандаи ҷиноятӣ, маҳбусон нони «хлеб»-ро истеъмол карданд. Мутаасифона, қаблан низ чандин ҳолатҳои заҳролудшавии шаҳрвандон дар натиҷаи истифодаи маводи хӯрока ба қайд гирифта шуда буданд ва сабаби заҳролудшавии шаҳрвандон истифодаи нитрати натрий буд. Чунин ҳолатҳо дар шаҳри Кӯлоб ва Хуҷанд рух дода буданд», — гуфт Прокурори генералии Тоҷикистон.
Юсуф Раҳмон зикр намуд, ки натиҷаҳои тафтишот рӯзҳои наздик ба таваҷҷуҳи мардум ва расонаҳои хабарӣ расонида мешаванд.
Прокурори генералӣ ба суоли хабарнигорон дар бораи он ки оё сабаби марги маҳбусон лату кӯби онҳо шудааст, посухи рад дод.
«Ҳеҷ кас лату кӯб нашудааст. Мо тамоми ҷасадҳоро аз ташхис гузарондем. Дар ҷасадҳо ҳеҷ нишонае аз лату куб дида намешуд», — гуфт Юсуф Раҳмон.
Вай илова намуд, ки дар ҳоли ҳозир ду нафар аз маҳбусони зикршуда зинда ҳастанд ва онҳоро аз ташхиси тиббӣ гузарондаанд.
Ёдрас мешавем, ки ахиран ҳангоми интиқоли маҳбусон аз вилояти Суғд ба шаҳри Душанбе 14 нафарашон аз истеъмоли нони пупанакзада ба ҳалокат расиданд.
Хотиррасон менамоем, ки 7-уми июли соли равон дар асоси нақшаи тасдиқгардидаи роҳбарияти Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон, 128 нафар маҳкумшудагон аз МИ 3/3, 3/5 ва МТ 9/2-и шаҳрҳои Хуҷанд ва Истаравшани вилояти Суғд дар 3 автомашинаи махсусгардонидашуда барои идомаи ҷазои ҷиноятӣ ба шаҳрҳои Душанбе, Норак ва Ёвон бояд интиқол дода мешуданд. Қатораи автомашинаҳои мазкур бо роҳбаладии дастаи посбонон соати 12:45 аз шаҳри Хуҷанд ҳаракат карда, соати 18:20 ба шаҳри Душанбе расид.
Дар роҳ, дар мавзеи Майхўраи ноҳияи Варзоб, яке аз маҳбусон 3 адад ноне (хлеб), ки бо худ ҳамчун дастовези муқаррарӣ доштааст, тибқи маъмул ба 16 нафар маҳбус тақсим кардааст. Баъди истифодаи он тақрибан бо гузашти ним соат бо он 16 маҳбус ҳолати дилбеҳузўрӣ, сарчархзанӣ, қайкунӣ ба вуқўъ пайвастааст. Баъдтар ҳолати онҳо боз ҳам бадтар мешавад. Соати 18:25 бригадаҳои махсуси ёрии таъҷилӣ бо ҷалби мутахассисони соҳаи тиб барои кўмаки аввалия вориди МТМН СРИҶҶ ВА ҶТ гардиданд.
Дар натиҷаи дидани чораҳои таъҷилӣ бо истифодаи кулли имконот, ба табибон муяссар гардид, ки танҳо ҳаёти 2 нафар аз маҳбусон наҷот дода шавад. Мутаассифона, новобаста аз дидани чораҳои таъхирнопазири тиббӣ наҷоти 14 нафар аз маҳбусон муяссар нагардид. Боқимонда 114 нафар маҳбус бе нишонаи осеби ҳолати ҷисмонӣ, тибқи таъинот дар муассисаҳои ислоҳии марбут ҷобаҷо шуданд.
Оид ба ҳодисаи мазкур аз ҷониби Прокуратураи Генералии Ҷумҳурии Тоҷикистон парвандаи ҷиноятӣ оғоз гардида, вобаста ба он гурўҳи махсуси тафтишотӣ таъсис дода шуд.
Манбаъ: АМИТ «Ховар»
Нет комментариев