Бо иштироки иҷрокунандаи вазифаи Раиси вилояти Суғд Раҷаббой Аҳмадзода ва зиёда аз 80 нафар рӯзноманигорони дохилию хориҷӣ нишасти матбуотӣ баргузор гардид.
Сараввал иҷрокунандаи вазифаи Раиси вилоят Раҷаббой Аҳмадзода доир ба натиҷаҳои ҷамъбасти фаъолияти иқтисодию иҷтимоии вилоят дар соли 2017 ҳисобот дода, аз ҷумла афзуд, ки Мақомоти иҷроияи ҳокимияти давлатии вилояти Суғд баҳри иҷрои дастуру супоришҳои Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон дар соли таърихии таҷлили 25-солагии Иҷлосияи 16-уми Шӯрои Олии Ҷумҳурии Тоҷикистон дар самти суръатбахшии истеҳсолот, пешбурди ҳамаи паҳлӯҳои ҳаёти ҷамъиятию сиёсӣ, иқтисодию иҷтимоӣ, равнақи созандагию бунёдкорӣ ва ободонӣ чораҳои амалӣ андешида, ба нишондиҳандаҳои иҷтимоию иқтисодӣ устуворӣ ва тақвият бахшида шуд.
Зикр гардид, ки қисми даромади буҷети вилоят ба андозаи 104 фоизи нақша иҷро гардида, 1 миллиарду 607 миллиону 805 ҳазор сомониро такил дод. Иҷроиши қисми хароҷоти буҷети вилоят дар ин давра 1 миллиарду 569 миллиону 807 сомониро ташкил дод, ки нисбат ба нақша 99,9 фоиз мебошад.
Барои маблағгузории соҳаҳои маориф 100 фоизи ҳамаи маблағҳо, нигаҳдории тандурустӣ 99,7 фоиз, хоҷагии коммуналӣ 103,5 фоиз, чорабиниҳои фарҳангию варзишӣ 99,8 фоиз, суғуртаи иҷтимоӣ ва ҳифзи иҷтимоӣ 100,3 фоиз маблағ сарф карда шуд.
Дар моҳҳои январ – декабри соли 2017 корхонаҳои саноатӣ ба маблағи 9 миллиону 883 ҳазор сомонӣ маҳсулот исеҳсол карданд ва ҳаҷми истеҳсоли маҳсулоти саноатӣ нисбат ба соли 2016 бо назардошти индекси нархҳои истеҳсолкунандагони маҳсулоти саноатӣ 131,5 фоизро ташкил кард. Аз 593 корхонаи саноатии ҳисоботдиҳанда дар соли 2017-ум 379 корхона (64 фоиз) нисбат ба соли 2016 сатҳи истеҳсолотро баланд бардоштанд.
Ҳамин тавр, иҷрокунандаи вазифаи Раиси вилояти Суғд Раҷаббой Аҳмадзода доир ба бурду бохти соҳаҳои кишоварзӣ, чорвопарварӣ, хоҷагии ҷангал, сохтмони асосӣ, нақлиёт, хизматрасонии пулакӣ, фаъолияти иқтисодии хориҷӣ, бозори меҳнат ва музди меҳнат, тандурустӣ, пардохти нафақа ва кӯмакпулӣ ибрози андеша намуд.
Дар қисмати дуюми нишасти матбуотӣ намояндагони васоити электронӣ ва чопии ахбори омма бо саволҳои худ ба Раҷаббой Аҳмадзода муроҷиат намуда, посухҳои қаноатбахш гирифтанд. Бахусус, ба саволҳои Ҷовиди Аштӣ (рӯзномаи “Ҷумҳурият”), Ҷамшеди Маъруф (радиои “Пайванд”), Афзал Бозсолиев (ШТР “Азия”) ва дигарон роҳбари вилоят ҷавобҳои мушаххас дод.
Дар фарҷоми нишасти матбуотӣ натиҷаи озмуни вилоятии «Хомаи созанда-2017» эълон гардида, ғолибон бо Диплом ва тӯҳфаҳои пулии Мақомоти иҷроияи ҳокимияти давлатии вилояти Суғд тақдиронида шуданд.
Аз ҷумла, Ширкати телевизион, радио ва рекламавии «Тироз» барои таҳияи барномаҳои ҷолибу муассири телевизионӣ ва радиоӣ бо ду Дипломи дараҷаи дуюм ва мукофотҳои пулӣ сарфароз гардонида шуд.
Медиапортали «Тироз»
Нет комментариев