Як корманди ширкати аудитории “Сомон-Аудит” барои ошкор накардани камбудиҳо дар низоми “Барқи тоҷик” 12 ҳазор доллари амрикоӣ пора талаб кардааст.
Тибқи иттилои Вазорати умури дохилии Тоҷикистон корманди 57-солаи “Сомон-Аудит”, сокини шаҳри Хуҷанд бо гумони гирифтани мукофот бо роҳи тамаъҷӯӣ дастгир карда шуд: “Муттаҳам фаъолияти шабакаҳои барқии ноҳияи Аштро дар давраи аз 1-уми январ то 31-уми декабри соли 2015 санҷида, барои пинҳон нигоҳ доштани камбудиҳои ошкоркардааш аз масъули 50-солаи шабакаҳои барқи ноҳияи Ашт 12 ҳазор доллари амрикоӣ талаб намудаст”.
Ба иттилои манбаъ муттаҳам ҳамчун аудитор аз ваколатҳояш суистифода намуда, 6 феврал 2000 сомонӣ гирифта, 12-уми феврал зимни гирифтани 3000 доллари амрикоӣ дастгир гардид: “Аз рӯи ин ҳодиса парвандаи ҷиноӣ оғоз гардида, тафтишот идома дорад”.
Ифшои камбудиҳо дар фаъолияти масъулини “Барқи тоҷик” дар ҳолест, ки феълан ин ширкат бо қарзи 1,5 миллиард сомонӣ калонтарин қарздор дар Тоҷикистон ба шумор меравад. Мирзо Исмоилзода, раиси ширкати “Барқи тоҷик” аввали моҳи равон изҳор дошт, ки тамоми кормандони ширкаташро бо санҷиш ё худ аттестатсия фаро хоҳад гирифт.
Ӯ 4 феврал зимни нишасти хабарӣ дар Душанбе гуфт, то ҳол 1445 коргарро бо аттестатсия фаро гирифтаанд, ки аз ин 827 нафарашон аз санҷиш гузашта, беш аз 600 нафари дигар нагузаштаанд. Ба иттилои раёсати “Барқи тоҷик” феълан ин ширкат 12 ҳазору 867 корманд дорад, ки нисбати як соли пеш 421 нафар кам мебошад. Коҳиши коргаронро манбаъ ба гусели 188 нафақхӯр ва ихтисори коргарон рабт дод.
Манбаъ:http://www.ozodagon.com/
Нет комментариев