Дар арафаи ҷашни 27-солагии Истиқлолияти давлатии Ҷумҳурии Тоҷикистон, моҳи сентябри соли равон аввалин эстакадаи сесатҳа дар Тоҷикистон, ки дар буриши хиёбони Нусратуло Махсум бо хиёбони Бобоҷон Ғафурови ноҳияи Синои шаҳри Душанбе бунёд ёфтааст, мавриди баҳрабардорӣ қарор мегирад.
Тавре аз Маркази татбиқи лоиҳаи таҷдиди роҳҳои Ҷумҳурии Тоҷикистон ба хабарнигори АМИТ «Ховар» хабар доданд, лоиҳаи сохтмони ин эстакада дар доираи ҳамкории Ҳукумати Ҷумҳурии Тоҷикистон бо Бонки аврупоии таҷдид ва рушд ва Бонки осиёии сармоягузории инфрасохторӣ амалӣ гардида, паймонкори он Корпоратсияи роҳҳо ва кӯпрукҳои «Синдзян-Бейсин»–и Ҷумҳурии Мардумии Чин буда, сифати сохтмонро Ширкати машваратии «SAI»-и Ҳиндустон назорат мекунад.
Тарҳи мазкур дар доираи татбиқи «Беҳтар намудани ҳолати роҳи минтақавии Душанбе-Турсунзода», қитъаи роҳ аз ҳайкали Абуалӣ ибни Сино то дарвозаи ғарбии шаҳри Душанбе» бунёд гардидааст.
Ёдовар мешавем, ки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Раиси шаҳри Душанбе Рустами Эмомалӣ 13 апрели соли равон ба маҳаллаи 82-юми пойтахт ташриф оварда, бо ҷараёни корҳои сохтмонии эстакада дар ин мавзеъ аз наздик шинос шуданд.
Тавре маълум гардид, корҳои асосии сохтмонӣ дар иншооти мазкур пурра ба итмом расида, алҳол мумфаршкунии қитъаҳои алоҳидаи роҳ, сохтмони истгоҳҳои замонавӣ, таъмиру таҷдиди роҳҳои пиёдагард ва ободонии атроф дар арафаи анҷом қарор доранд.
Бояд зикр кард, ки бунёди чорсӯи нави 3-сатҳа имконият медиҳад, ки минбаъд ҳаракати нақлиёт дар ин масир бемамониат ба роҳ монда шавад. Дар сатҳи дуюми чорроҳаи мазкур роҳи давродаврӣ бунёд гардида, дар сатҳи сеюм аз самти шарқ ба ғарб як пул бо дарозии 125 метр сохта шудааст. Ҳамчунин дар доираи лоиҳаи мазкур 4 роҳи зеризаминӣ низ бунёд ёфтаанд, ки феълан таъмиру таҷҳизи онҳо дар арафаи анҷомёбӣ қарор дорад.
Бояд гуфт, ки ҳалқароҳи сесатҳаи навбатӣ дар чорроҳаи буриши хиёбони Исмоили Сомонӣ ва хиёбони Абуалӣ Сино бунёд мешавад, ки корҳои сохтмонии он аллакай шурӯъ гардидаанд.
Тибқи иттилои масъулин, то соли 2025 10 адад ва дар доираи амалишавии Нақшаи генаралии шаҳри Душанбе ҳамагӣ 20 адад чунин чорроҳаҳои сесатҳа дар пойтахт сохта мешаванд.
Нет комментариев