Мусобиқаи Гран Прии Марокаш ба нуқтаи ниҳоӣ расид. Дар ин маъракаи муҳташами ҷаҳонӣ, ки дар кишвари Марокаш баргузор шуд, Тоҷикистонро се ҷудочӣ азҷумла Беҳрӯзи Хоҷазода (-73кг), Акмал Муродов (-81кг) ва Темур Раҳимов (+100кг) намояндагӣ намуданд. Гран Прии Марокаш барои Беҳрӯз ва Акмал бебарор оғоз шуд, чаро ки онҳо дар нахустин набарди хеш аз рақибонашон шикаст хӯрда, аз идомаи сабқат маҳрум гардиданд. Умеди ягонаи тоҷикон танҳо ба Темур Раҳимов буд. Дар рӯзи сеюми ин чорабинии мазкур паҳлавони қавипанҷаи тоҷик — Темур дар даври аввал озод буда, рақобатро аз даври дуюм бо намояндаи Ҳолланд — Ҷур Спиҷкерс баргузор намуд. Дар ин майдондорӣ Темур рақибашро шикаст дода, ба даври сеюм роҳ ёфт. Гарчанде, ки дар даври сеюм аз ҷудочии олмонӣ шикаст хӯрда бошд ҳам, аммо ӯ аз идомаи сабқатҳо маҳрум нашуд. Пасон Темур паҳлавони Тунисиро мағлуб намуда, барои нишони биринҷии ин сабқат бо гӯштингири кишвари Руминия рӯ ба рӯ шуд. Дар ин набард низ Темур аз маҳорату малакаи хеш истифода карда, Симионеску Владутро шикаст дода, соҳиби медали биринҷии Гран Прии Марокаш гардид. Хотиррасон мекунем, ки ин аввалин медали ҷудочиёни тоҷик дар соли 2019 ба ҳисоб меравад. Зимнан, Grand Prix дар Марокаш, ки баъди Grand Prix дар Телавиви Исроил, Grand Slam дар Парижи Фаронса ва Grand Slam дар Дюсселдорфи Олмон чорумин чорабинии имсола аз силсилаи мусобиқоти ҷаҳонии ҷудо ба шумор меравад, ба варзишгарон имкон дод то ҷиҳати дарёфти роҳхатҳо ба Бозиҳои тобистонаи олимпии соли 2020 дар Токио дар рейтинги ҷаҳониву олимпӣ имтиёзҳо ба даст биёранд. Ба ғолибону ҷоизадорони Гран Прии ҷудо дар Марокаш ба ҷуз медал ҷоизаҳои молӣ низ тақдим карда шуд. Барои ҷойи аввал 3000 доллар, барои мақоми дуюм 2000 доллар ва барои зинаи сеюм бошад, 1000 доллари амрикоӣ супурда шуд.

Манбаъ: ТВ  Варзиш