Доштани дӯсти соҳибкор ва сармоя барои сохтани филм дар Ҳолливуд басанда нест. Охир коргардон бояд иродаи қавӣ ва филмномаи хубе ҳам дошта бошад, — мегӯяд Ҷайҳун Насимӣ.
Коргардони ҷавони тоҷик Ҷайҳун (Ҷеймс) Насимӣ дар мусоҳиба бо Sputnik Тоҷикистон дар бораи раванди сохтани филми худ «Unfallen» (Шикастнопазир) сӯҳбат кард.
Дар феҳрасти филмҳои нави «Ҳолливуд» нахустин бор филми коргардони тоҷик Ҷайҳун Насимӣ — «Unfallen» нашр шуд.
Ин филм, ки бо ҳазинаи 650 ҳазор доллар сохта шуда, сарнавишти ду бародар — Рустам ва Сӯҳробро бозгӯ мекунад, ки дар хурдсолӣ дар замони ҷанги шаҳрвандии Тоҷикистон аз ҳам ҷудо шуда ва ба амри тақдир боз рӯ ба рӯ мешаванд.
«Ҳаргуна филмнома ва филме, ки розу киноя ва рӯёрӯии ду нерӯро дода бошад, чашмгиру ҳаяҷонбарангез аст. Вале ҳангоми омода кардани филмнома ман қасд доштам, ки каме ҳам бошад торихи мардум ва кишварамро низ ба намоиш бигзорам. Аз ин рӯ, достони филм аз ҷанги шаҳрвандии Тоҷикистон оғоз мешавад», — гуфт Ҷайҳун Насимӣ.
Аммо паёми аслии ин филм ин аст, ки коргардони тоҷик мехоҳад ба мардуми Амрико ва Ғарб бифаҳмонад, ки миллатҳову динҳо ба худии худ хубу бад нестанд, балки бархе касон ҳастанд, ки хубу бад мешаванд, ки ҳисобашон аз умум ҷудост.
«Ин нахустин филми ман дар Ҳолливуд аст ва дар он ҳунарпешаҳои номдор Майкл Мэдсен ва Ҷеймс Ҳонг нақш офаридаанд, ки бо коргардоне пуровоза чун Квентин Тарантино ҳамкорӣ доштаанд. Дар ин филм ҳамчунин чаҳор ҳунарпешаи тоҷик низ нақш иҷро кардаанд», — гуфт Насимӣ.
Вай мегӯяд, ки барои таҳияи ин филм ҳам нерӯ бисёр ба кор рафта ва ҳам ҳазина бисёр шуда ва дар ин амр соҳибкори тоҷике аз Лос-Анҷелес Сироҷиддин Мирзоев ёрияшро аз коргардони тоҷик дареғ надоштааст.
«Ӯ дӯсти деринаи ман аст. Вай пас аз тамошои филми пешинаам — «Фариштаи бе болу пар» тасмим гирифааст, ки дар сабти ин филмам кӯмак кунад. Сироҷиддин ба ман занг зада гуфт, ки филми пешинам ӯро тасхир кардааст ва ӯ тасмим дорад филми навамро сармоягузорӣ кунад. Ман дар ҳамон замон филмномаи «Unfallen»-ро омода мекардам. Чуноне мегӯянд, дӯстам дар замону макони зарурӣ пайдо шуд», — мегӯяд бо хушнудӣ Насимӣ.
Вале ба гуфти худи коргардони тоҷик, доштани дӯстону сармоя барои сохтани филм дар Ҳолливуд басанда нест. Коргардон бояд худ иродаи қавӣ ва филмномаи хубе дошта бошад.
Он вақт на танҳо дарҳои санъати синамову телевизюни Амрико, балки дили мардуме, ки мехоҳанд туро тамошо ва гӯш бикунанд, боз мешавад.
Манбаъ: сомонаи Спутник ТҶ
Нет комментариев