Соли дуюм аст, ки бо мақсади дар амал татбиқ намудани дастуру ҳидоятҳои Асосгузори сулҳу Ваҳдати миллӣ-Пешвои миллат, мӯҳтарам Эмомалӣ Раҳмон дар бобати фароҳам овардани ҷойҳои нави корӣ бо иқдоми Раёсати Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд ярмарка таҳти унвони «Интихоби мутахассисони арзанда» доир мегардад.
Ҳадаф аз баргузории чорабинии мазкур нишон додани самараи фаъолияти маркази мартабаи донишкада ва робитаи онҳо бо корхонаву ташкилотҳо, ҳамчунин таъмин намудани корхонаҳо бо мутахассисони арзанда аз ҳисоби хатмкунандагони донишкада маҳсуб меёбад.
Барои дарёфти мутахассисони арзанда зиёда аз 50 коргоҳу ширкатҳо аз ҷумла, ширкатҳои сохтмонии «Тиниал», «Суғдшаҳрофар» «Равзана пласт», коргоҳҳои истеҳсолии «Дӯсти Амирхон», «САТН», «Хлебокомбинат», «Фаровон», «Файзи расул», «Зерновая компания», «Зода», «Яхмоси 33» «Ҷавонӣ», Ҷамъияти саҳомии «Сорбон», «Барқи тоҷик», бонкҳои «Эсхата», «Матин», «Имон-интернешнл», «Арванд», «Спитаменбонк», ширкат доштанд.
Дар ярмарка ҳамаи кафедраҳои донишкада дастовардҳои илмию истеҳсолии худ, фаъолияти пойгоҳу озмоишгоҳо, мувафаққиятҳои собиқ хатмкунандагони худро пешкаши ҳозирин намуданд.
Дар расми ифтитоҳи чорабинии мазкур муовини директори донишкада, номзади илмҳои физика ва математика Хуршед Мақсудов баромад намуда, аз ҷумла таъкид дошт, ки бо ҷойи кори доимӣ таъмин намудани шаҳрвандон яке аз масъалаи муҳим ва омили пешравии иқтисод ва беҳбудии зиндагии аҳолӣ ба ҳисоб меравад. Ва ин нукта пайваста дар суханронии Асосгузори сулҳу ваҳдати миллӣ, Пешвои миллат, мӯҳтарам Эмомалӣ Раҳмон зикр мегардад.
Сипас мулоқоти озоду шаффофи корхонаҳо бо 953 нафар хатмкунандаи донишкада дар аудитрияҳо сурат гирифт. Кордиҳанда, яъне ташкилоту корхонаҳо фаъолияти худро бо назардошти имкониятҳо ва афзалиятҳо нишон доданд, ва барои ишғоли вазифаҳои муайяншуда мутахассисони варзидаро интихоб намуданд.
Дар натиҷа 44 нафар хатмкунандагон худи ҳамин рӯз соҳиби ҷойи кори доимӣ гардиданд. Хатмкунадагони дигар бошад, пас аз гузаштани сӯҳбатҳо соҳиби ҷойи кор хоҳанд шуд.
Нет комментариев