Президенти Ҷумҳурии Тоҷикистон Эмомалӣ Раҳмон бо сафари расмӣ вориди шаҳри Ашхобод, пойтахти Туркманистон шуд. Дар доираи сафари расмӣ ба Туркманистон Президенти Ҷумҳурии Тоҷикистон Эмомалӣ Раҳмон дар майдони ёдгории шаҳри Ашхобод бо нишони эҳтиром ба таъриху тамаддуни мардуми туркман ба муҷассамаҳои ёдгорӣ бахшида ба муҳорибаи Гуктеппа ва қурбониёни заминларза дар шаҳри Ашхобод дар назди “оташи абадӣ” гулчанбар гузошт. Дар шаҳри Ашхобод Президенти Ҷумҳурии Тоҷикистон Эмомалӣ Раҳмон дар шаҳраки олимпӣ бо маҷмааи замонавии варзишӣ аз наздик шинос шуд. Иттилоъ дода шуд, ки соли 2017 дар Туркманистон бозиҳои панҷуми осиёӣ доир мегардад ва маҷмааи варзишӣ макони асосии баргузории ин чорабиниҳо хоҳад гашт. Бегоҳии рӯзи 20 — уми август Президенти Ҷумҳурии Тоҷикистон Эмомалӣ Раҳмон баъди анҷоми сафари пурмаҳсули расмӣ аз шаҳри Ашхободи Туркманистон ба Ватан баргашт. Мавриди зикр аст, ки сафари навбатии расмии Президенти Ҷумҳурии Тоҷикистон Эмомалӣ Раҳмон ба Туркманистон бо расидан ба тавофуқоти зиёд дар самти рушду густариши муносибатҳои ҳамкорӣ дар бахшҳои барои ҳарду ҷониб манфиатовар анҷом ёфт. Тавре маълум гардид, байни Тоҷикистону Туркманистон аз рӯзҳои нахустини ба роҳ мондани муносибатҳои дипломатӣ қариб 70 санади муҳими ҳамкорӣ мавҷуд буд ва дар доираи ин сафар боз 5 санад ба имзо расид. Сарони ду давлат Эмомалӣ Раҳмон ва Гурбонгулӣ Бердимуҳаммадов баробари баррасии масъалаҳои муҳими ҳамкорӣ, инчунин ҳадафҳои баҳрабардорӣ аз имкониятҳои зиёди истифоданашударо муҳокима карданд. Ба хотири идомаи муколамаи сиёсӣ баҳри таҳкиму тавсеаи ҳамкориҳо Президенти Ҷумҳурии Тоҷикистон Эмомалӣ Раҳмон аз Президенти Туркманистон даъват ба амал овард, ки бо сафари расмии ҷавобӣ ба Тоҷикистон ташриф орад. Дар ин бора агентии Ховар хабар медиҳад.
ХХХ
Кормандони соҳаи тибби вилоят иди касбии худ ва 1 ҳазору35 — солагии устоди табибони олам — Абӯали ибни Синоро, ки ба 18-уми август рост меояд, ботантана таҷлил намуданд. Чорабинии идона дар Кохи Рӯдакии маркази вилоят сурат гирифт. Кормандони соҳаи тандурустиро муовини Раиси вилоят Назира Ғаффорӣ аз номи роҳбарияти Мақомоти иҷроияи ҳокимияти давлатии вилояти Суғд таҳният гуфт. Тавре иттилоъ дода шуд, имрӯз дар вилоят 29 нафар Кормандони шоистаи Тоҷикистон, 18 нафар дорандагони Медали шафқат, 8 нафар докторони илм, 55 нафар номзадҳо ва даҳҳои дигар дорандагони нишони Аълочии тандурустии Тоҷикистон фаъолият мебаранд. Давоми се соли охир шумораи кормандони соҳаи тандурустии вилоят аз 4 ҳазору 297 ба 4 ҳазору 711 нафар расидааст, ки то андозае эҳтиёҷоти муассисаҳои тиббиро ба мутахассисон коҳиш бахшидааст. Ба муносибати Рузи табибон як қатор пешсафони соҳа бо сипосномаю тӯҳфаҳои хотиравии мақомоти иҷроияи ҳокимияти давлатии вилоят ва теъдоди дигар бо нишони сарисинагии Аълочии тандурустии Тоҷикистон мукофотонида шуданд. Бо фармони вазири тандурустии ҷумҳурӣ барои рушди назарраси соҳа дар вилояти Суғд Раиси вилоят Абдураҳмон Қодирӣ низ бо нишони Аълочии тандурустии Тоҷикистон сарфароз гардонида шуд. Рӯзи касбии кормандони соҳаро барномаи бошукуҳи фарҳанги таровати тозаи идона бахшид. Дар ин бора аз хадамоти матбуотии Раиси вилояти Суғд хабар медиҳанд.
ХХХ
Санаи 19 августи соли ҷорӣ дар истироҳатгоҳи солимгардонии «20-солагии Истиқлолияти Тоҷикистон», воқеъ дар ноҳияи Ҷаббор Расулов барои наврасони ВМКБ ва минтақаи Рашт, инчунин ҳамсолони суғдии онҳо барномаи ҷолиби фарҳангӣ пешниҳод шуд, ки дар он муовини Раиси вилояти Суғд Назира Ғаффорӣ низ иштирок намуд. Дар ин чорабинӣ Ҳоҷӣ Ҳусейн Мӯсозода, раиси Шӯрои уламои дини вилоят низ иштирок ва суханронӣ намуд. Дар ин рӯз аз ҷониби санъаткорон барои истироҳати хуши наврасону ҷавонон барномаи консертӣ манзур шуд, ки он аз ҷониби аҳли нишаст хуб истиқбол шуд. Наврасону ҷавонони ВМКБ ва ноҳияи Рашт дар баробари ҳамсолонашон аз вилояти Суғд ба рақс баромада, дар фазои дӯстӣ ин шоми истироҳатии худро ба як лаҳзаи нотакрори фаромушнашуданӣ табдил доданд. Пас аз анҷоми барномаи консертӣ муовини Раиси вилоят Назира Ғаффорӣ аз синфхонаҳое, ки барои гузаронидани маҳфилҳои атласу адрасбофӣ, кашидадӯзӣ ва расмкашӣ муҷаҳҳаз гардонида шудаанд, дидан намуда, бо ҷараёни ҳунаромӯзии истироҳаткунандагон шинос гардид ва барои боз ҳам беҳтар намудани ҳолати синфхонаҳо дастурҳои мушаххас дод. Гуфтанист, ки дар ин рӯз аз ҷониби Шӯрои уламои дини вилоят барои якояки наврасону ҷавонони ВМКБ ва ноҳияи Рашт сару либос тӯҳфа карда шуд. Ҳамзамон аз ҷониби ходимони дини вилоят дар ин шом дастурхони идона ороста шуд.Дар ин бора аз хадамоти матбуотии Раиси вилояти Суғд хабар медиҳанд.
ХХХ
Ба таъкиди мутахассисон аз замони мушоҳидаи обу ҳаво, ки аз соли 1880 ба ин сӯ оғоз шудааст, моҳи июли соли 2015 аз ҳама гармтарин дар сайёраи Замин маҳсуб меёбад. Дараҷаи миёнаи гармӣ соли ҷорӣ 16,16 дараҷаро ташкил дод. Охирин маротиба моҳи июли соли 1998 чунин гармӣ ба қайд гирифта шуда буд. Вале соли равон рекорди қаблиро шикаст. Обуҳавошиносон пешгӯйи мекунанд, ки тамоми соли равон гарм хоҳад омад. Дар ин бора сомонаи Ҷаҳоннамо хабар медиҳад.
ХХХ
Тибқи иттилои Кумитаи миллии олимпии кишвар, Конфедератсияи футболи Осиё шаҳри Хуҷандро ба сифати макони баргузории сабқати интихобии қаҳрамонии футзали Осиё-2016 дар Осиёи Марказӣ тасдиқ кард. Сабқати интихобӣ аз 14 то 16 ноябри соли равон дар маҷмааи нави «Қасри варзиш»-и Хуҷанд баргузор хоҳад шуд. Ба иттилои манбаъ, дар марҳилаи интихобии қаҳрамонии Осиё-2016 дар минтақаи Осиёи Марказӣ чаҳор дастаи мунтахаб — Тоҷикистон, Қирғизистон, Туркманистон ва Афғонистон — ширкат меварзанд. Аз ин минтақа ду дастаи беҳтарин ба қисми ниҳоии мусобиқаи қитъавӣ, ки аз 10 то 21 феврали соли оянда дар пойтахти Ӯзбекистон — Тошканд барпо мегардад, роҳ меёбанд. Ёдовар мешавем, ки дастаи мунтахаби футзали Тоҷикистон дар ҷараёни ҷамъомади таълимиву тамринии даста дар Дубай ва Эл-Кувайт панҷ бозии санҷишӣ анҷом дод. Дар ин бора агентии Ховар хабар медиҳад.
Нет комментариев