Раиси Ҳизби Халқии Демократии Тоҷикистон, Президенти кишвар Эмомалӣ Раҳмон гурӯҳи номзадҳо ба вакилӣ ба Маҷлиси намояндагони Маҷлиси Олии Ҷумҳурии Тоҷикистонро, ки аз ҳавзаи ягонаи умумиҷумҳуриявӣ аз ҳисоби аъзои фаъоли Ҳизби Халқии Демократии Тоҷикистон пешбарӣ шуданд, барои суҳбат ба ҳузур пазируфт. Сарвари давлат Эмомалӣ Раҳмон онҳоро ба намояндагии шоиста аз Ҳизби Халқии Демократии Тоҷикистон дар маъракаи пешазинтихоботӣ, риояи фарҳанги волои сиёсию ҳуқуқӣ, бо таҳаммулу тавозӯъ ба роҳ мондани рақобат бо номзадҳо аз дигар ҳизбу ҳаракатҳои сиёсӣ, муаррифии дурусту фаҳмои барномаи пешазинтихоботии ҳизби мазкур ҳидоят кард. Ба вакилӣ ба Маҷлиси намояндагони Маҷлиси Олии Ҷумҳурии Тоҷикистон аз ҳавзаи ягонаи умумиҷумҳуриявӣ аз ҳисоби аъзои фаъоли Ҳизби Халқии Демократии Тоҷикистон 28 нафар пешбарӣ шудаанд. Аз онҳо 11 нафар занон ва аксари куллашон олимону мутахассисони варзидаи соҳаҳои гуногун мебошанд. Дар ин бора агентии Ховар хабар медиҳад.
Х Х Х
Акс аз: topvideo.tj
Дар бозори марказии Панҷшанбе беш аз 300 адад нуқтаҳои савдо мавҷуд буда, ҳамарӯза наздики 1000 нафар соҳибкорон бо тиҷорат машғуланд. Тавре муассиси бозори марказии Панҷшанбе Абдураҳим Исмоилов иброз дошт, онҳо ҳаматарафа соҳибкоронро дастгирӣ мекунанд. Давоми сол аз тарафи муассисаи бозор боми марказ ва шифти дохили он ба мабалағи 100 000 сомонӣ аз таъмири хушсифат бароварда шуд. Номбурда иттилоъ дод, ки аз сабаби он ки ба Кодекси андоз тағйироти иловагӣ дароварда шудааст ва ҳаққи хизматрасонии коммуналӣ гарон шуд, соли 2015-ум иҷорапулӣ ба фоизи муайян боло бардошта хоҳад шуд. Ин маълумот дар маҷлиси якҷоияи масъулини бозор ба ҳозирин расонида шуд. Дар маҷлиси мазкур намояндагони МИҲД-и шаҳри Хуҷанд, нозироти андоз ва хадамоти давлатии оташнишонии шаҳри Хуҷанд ва соҳибкорон иштирок намуданд. Дар вохӯрӣ ҳамчунин иттилоъ дода шуд, ки минбаъд дар бозори марказии Панчшанбе маводи зиддисӯхторӣ истифода бурда мешавад, ки ба таври автоматӣ сӯхторро хомӯш мекунад. Бояд гуфт, ки маводи мазкур аз ҷониби ташкилоти ҷамъиятии зиддисӯхтор оварда шудааст. Дар ҷараёни маҷлис соҳибкорон фикру андешаҳояшонро ба масъулин иброз намуданд. Дар ҷамъомад ҳамчунин намояндагони хадамоти давлатии оташнишонии шаҳри Хуҷанд, нозироти андоз иштирок намуда барои пешрафти соҳибкорӣ фикру андешҳояшонро баён намуданд. Дар интиҳои ҷамъомад масъалаҳои ба миёномада баррасӣ шуда, нақшҳои соли 2015-ум таҳрезӣ шуданд. Дар ин бора ҳамкоронамон аз телевизиони Азия иттилоъ медиҳанд.
Х Х Х
Акс аз: www.tojnews.org
Дар даҳ моҳи соли равон корхонаҳои саноатии вилояти Суғд дар ҳаҷми 3 хазору 14,8 млн. сомонӣ маҳсулот истеҳсол кардаанд. Бино ба иттилои расмӣ, ин рақам нисбат ба ҳамин давраи соли гузашта 717,2 млн. сомонӣ зиёд аст. Аз 550 корхонаҳои саноатӣ 225 корхона вусъати афзоишро нисбат ба ҳамин давраи соли гузашта таъмин намуданд. Тибқи нақша соли 2014 бояд 160 корхонаҳои нав, бо теъдоди 5 ҳазор ҷойҳои нави корӣ сохта шаванд. Дар 10 моҳи соли ҷорӣ 129 корхонаҳои нави хурду бузург, бо теъдоди 2 хазору 600 ҷойҳои нави корӣ ба фаъолият шурӯъ намуданд. Корхонаҳои таъсисдодашуда, асосан корхонаҳои соҳаи саноати масолеҳи сохтмон, хӯрок, сабук ва маъданҳои кӯҳиро дарбар мегиранд. Дар ин бора ҳамкоронамон аз телевизиони Азия иттилоъ медиҳанд.
Х Х Х
Се сарояндаи номии Тоҷикистон дар Озмуни байналмилалии «Сулҳи Симурғ», ки дар шаҳри Кобули Афғонистон баргузор шуд, ғолиб эълон гардидаанд. Тавре иттилоъ дода шуд, муовини аввали раиси Кумитаи телевизион ва радио Давлатманд Холов, роҳбари бадеии ансамбли давлатии «Фалак»-и Кумитаи телевизион ва радиои назди Ҳукумати ҶТ, Ҳунарманди халқии Тоҷикистон, барои ҳифзу густариши ҳунари фалаксароӣ ғолиб омадааст. Инчунин, ҳунармандон Гулчеҳра Содиқова ва Далер Назаров барои ривоҷи мусиқӣ ва сурудхонии суннатӣ ва замонавии тоҷик ғолибони озмуни номбурда дар соли 2014 дониста шуданд. Озмуни байналмилалии «Сулҳи Симурғ» аз соли 2009 инҷониб доир мегардад. Ҷоизаҳои асосии ин озмун дар ду ним сол як маротиба ба беҳтарин намояндагони адабу ҳунари кишварҳои форсизабон эҳдо мегардад. Дар ин бора Pressa.tj хабар медихад.
Х Х Х
Дастаи мунтахаби ҷавонони футболи Тоҷикистон бар асоси қуръакашии мусобиқаи 23-уми байналмилалии Ҷоми Иттиҳод-2015, ки рӯзи 18-уми декабр дар Хонаи футболи Русия баргузор шуд, дар гурӯҳи “С” бо тимҳои Ҷумҳурии Африқои Ҷанубӣ, Литва ва Қазоқистон рақобат хоҳад кард. Ин мусобиқа аз 16-ум то 25-уми январи соли 2015 бо ширкати 12 даста , ки ба се гурӯҳ тақсим шудаанд, дар Маҷмааи варзишию фарҳангии «Петербургский»-и шаҳри Санкт-Петербурги Русия баргузор мешавад. Ба ҳайати дастаҳои ширкаткунандаи ин мусобиқа футболбозони соли таваллудашон 1994 ва аз он хурд дохил мешаванд. Дар Ҷоми Иттиҳод, ба ҷуз 10 дастаи мунтахаби кишварҳои собиқи шӯравӣ, инчунин тимҳои ҷавонони Финляндия ва Африқои Ҷанубӣ ширкат хоҳанд кард. Дар ин бора радиои Озодӣ хабар медиҳад.
Нет комментариев