ХХХ

Дар арафаи соли нави мелодӣ Раиси вилоят Абдураҳмон Қодирӣ дар қароргоҳи Сарвари давлат, воқеъ дар шаҳри Хуҷанд бо гурӯҳи калони  шоирону нависандагон, ходимони давлатию ҷамъиятии вилоят мулоқоти гарму самимӣ орост. Раиси вилоят оид ба натиҷаи самтҳои мухталифи хоҷагии халқи вилоят дар соли равон ҳарф зада, қайд намуд, ки мақомоти иҷроияи ҳокимияти давлатии вилоят ба таъмини се ҳадафи асосии худ дар ин давра муваффақ гардид. Дар ин сол хоҷагиҳои калонҳаҷми кишоварзӣ мавриди таҷдид қарор дода шуда, зиёда аз 35 ҳазор хоҷагиҳои хурди инфиродиву оилавӣ таъсис дода шуд. Дар самти эҳёи ҳунарҳои мардумӣ, ки ба хотири таъмини сокинон, махсусан занон бо ҷои кор амалӣ карда шуд, наздик 9 ҳазор нафар ба касбомӯзӣ фаро гирифта шуданд. Дар доираи соли роҳҳои обод бошад, ҳолати зиёда аз 2800 километр роҳҳо беҳтар карда шуд. Дар идомаи сухан Раиси вилоят зикр намуд, ки соли 2015 дар қаламрави вилоят соли рушди фарҳанг қабул гардидааст ва мақомоти иҷроияи ҳокимияти давлатии вилоят дар ин замина дар нақша дорад, ки давоми соли оянда бунёд ва таъмиру азнавсозии як қатор қасрҳои фарҳанги шаҳру навоҳии вилоятро ба анҷом расонида, баҳри ташвиқу тарғиби фарҳанги волои ниёгон дар қаламрави вилоят як қатор чорабиниҳои мухталифи фарҳангӣ баргузор намояд, ки аз ҷумлаи онҳо таҷлили Наврӯзи байналмилалӣ дар вилоят ба ҳисоб меравад. Бо ин мақсад айни замон дар вилоят корҳои ободониву бунёдкорӣ оғоз ёфтааст. Дар ин бора  sugd.tj

ХХХ

Дар «Маркази солимгардонии норасои ва ҳифзи кўдакон»-и шаҳри Хуҷанд 43 нафар кўдакон ва наврасони аз 7 то 17 сола   аз ҳар  минтақаи вилояти Суғд,  ки бо сабаби вазъи номусоиди оила, шароити иҷтимоӣ ва волидайн надоранд тарбия мегиранд. Имсол аз ҷониби ҳокимияти маҳалли шаҳри Хуҷанд дар маҷмўъ 278 ҳазор сомонӣ маблағ ба Муассисаи давлатии  «Маркази солимгардонии  норасоӣ   ва ҳифзи кўдакон»-и шаҳри Хуҷанд ҷудо  карда шуд, изҳор дошт директори муассисаи мазкур Тӯҳфа Эргашева. Дар идомаи сӯҳбат Тӯҳфа Эргашева зикр намуд, ки дар  муассиса ба кўдакон ва наврасон хунарҳои гуногун аз қабили дўзандагӣ, пухтани таомҳо  ва ҳамчунин забонҳои хориҷӣ омўзонида шуда, ҳамаи кўдакон ва наврасони ин муассиса ба таҳсили мактаби миёна фаро гирифта шудаанд. Бахшида  ба соли нави мелодӣ дар  Муассисаи давлатии «Маркази солимгардонии норасоӣ ва ҳифзи  кўдакон»-и шаҳри Хуҷанд чорабинии соли навӣ бо иштироки Ширкати телевизион ва радио рекламавии Тироз, ташкилоти қарзии хурди Финка ва соҳибкорзанон   баргузор гардид. Дар чорабинӣ наврасон баромад намуда, саҳнаҳои ҳаҷвӣ намоиш доданд. Ҷоизи зикр аст, ки дар ҳар ҷашну маросимҳо барои ин кӯдакон дастурхони идона густурда мешавад. Аз ҷумла дар арафаи соли нави мелодӣ аз ҷониби соҳибкорзанон барои тарбиятгирдандагони Муассисаи давлатии «Маркази солимгардонии норасоӣ ва ҳифзи кўдакон»-и шаҳри Хуҷанд пойафзол ва маводи яквақтаинаи озуқа тақдим гардид. Ҳамчунин дар ин рӯз  аз тарафи Ширкати радио-телевизион ва рекламаи Тироз ва Ташкилоти қарзии хурди  Финка ба кўдакон ва наврасони муассисаи мазкур тўхфаҳои солинавӣ  тақдим гардида, аз ҷониби Раиси шаҳри Хуҷанд Раҷаббой Аҳмадзода дастархони идона ороста шуд. Дар ин бора ҳамкорамон Саодат Исмоилӣ хабар медиҳад.

ХХХ

Соли 2015 дар вилояти Сугд соли гулхо эълон карда шудааст. Тавре ки аз маркази матбуоти раиси вилояти Суғд иттилоъ доданд, шурӯъ аз 25 декабри соли 2014 дар ин бора Қарори раиси вилояти Суғд Абдураҳмон Қодирӣ  «Дар бораи тасдиқ намудани Барномаи вилоятии «Соли 2015 — соли гулҳо» ба тасвиб расид. Ба гуфти манбаъ,  мақсади асосии барномаи мазкур- ин пеш аз ҳама  эҳё намудани анъанаҳои неки бунёдкории аҷдодон, инкишофи ташаббускориву фаъолнокии ҳар як сокини вилоят ва дар ин замина тақвият бахшидан ба корҳои ободониву созандагӣ, сабзазоркунию гулзоркунӣ дар  маҳалли зист мебошад. Дар ин бора агентии Ховар хабар медихад.

Дар арафаи соли нав ширкати Мегафон бо иштироки кормандони васоити ахбори оммаи вилоят нишасти матбуотӣ доир намуд. Зимни нишасти мазкур ширкати Мегафон фаъолияти соли 2014-ро натичагирӣ намуда, ба ҳозирин ҳисобот дод.  Тавре иттилоъ дода шуд,  аз ҷониби ширкати Мегафон  дар соли сипаригардида якчанд лоиҳаҳо пешниҳод гардида, аксия ва маъракаҳои мухталиф гузаронида шуданд. Аксарияти ин лоиҳаҳо ҳадафи  тоза нигох доштани муҳити зист, пешгирии садамаҳои роҳу нақлиётӣ, баланд бардоштани савияи дониши донишҷӯёни Донишгоҳҳои олии кишвар ва ҳамчунин беҳтар намудани робита бо муштариёнро дошт. «Шахри сабз», «Рузи микроноҳия», «Ба ранги сабз гузар», Мега-донишҷӯ ва ғайраҳо аз ҷумлаи чунин маъракаҳо буданд. Тавре директори ширкати Мегафон дар вилояти Суғд Фирдавс Зеваров иброз намуд, дар рушди ширкат ҳамчунин саҳми рӯзноманигорон хеле назаррас буд.  Дар ҷамъбасти чорабинӣ шартномаҳо оид ба ҳамкориҳои минбаъда бо кормандони васоити ахбори умум баста шуда, ба онхо тӯҳфаҳои хотиравӣ супорида шуданд.

ХХХ

Дар Душанбе, дар қароргоҳи Кумитаи миллии олимпии Тоҷикистон, маросими супурдани ҷоизаҳо ба беҳтарин варзишгарони сол баргузор шуд. Дар ин маросим дар бораи натоиҷи ширкати варзишгарони тоҷик дар мавсими соли 2014 иттилоъ дода шуд. Зикр гардид, ки бузургтарин мусобиқоти имсола барои варзишгарони тоҷик Бозиҳои 17-уми осиёӣ маҳсуб меёбад, ки дар шаҳри Инчони Кореяи Ҷанубӣ баргузор шуданд. Дар ин мусобиқоти бузурги қитъавӣ 90 варзишгари тоҷик аз рӯи 16 намуд, ба монанди бокс, дзюдо, гуштии озод ва юнониву румӣ, варзиши сабук, тирандозӣ, футбол, шиноварӣ, картэдо, таэквондо ВТФ, вазнабардорӣ, камонварӣ ва ғайра ширкат карда, 5 медал, 1 медали тилло, 1 нуқра ва 3 биринҷӣ ба даст оварданд.” Дар чорабини даҳ варзишгари беҳтарини Тоҷикистон дар соли 2014, ки онҳоро Ассотсиатсияи журналистони риштаи варзиши Тоҷикистон бар асоси назархоҳии хабарнигорони соҳа муайян кардааст, бо ҷоизаю дипломҳои Ассотсиатсияи журналистони риштаи варзиши Тоҷикистон ва мукофоти молии Кумитаи миллии олимпии кишвар сарфароз шуданд. Дар ин бора радиои Озодӣ хабар медиҳад.