Президенти кишвар Эмомалӣ Раҳмон вазирони корҳои дохилӣ ва амнияти ҷамъиятии давлатҳои аъзои Созмони ҳамкории Шанхайро, ки барои иштирок дар ҳамоиши навбатӣ ба Тоҷикистон ташриф овардаанд, ба ҳузур пазируфт. Дар мулоқот масоили вобаста ба муборизаи муштарак бо ҷинояту ҷинояткорӣ, хусусан ҷиноятҳои созмонёфтаи фаромиллӣ, ба мисли терроризму ифротгароӣ, гардиши ғайриқонунии маводи мухаддир ва ҷиноятҳои иттилоотӣ дар фазои кибернетикӣ, баррасӣ шуд. Сарвари давлати Тоҷикистон Эмомалӣ Раҳмон аз шиддат гирифтани авзои иҷтимоию сиёсӣ дар кишварҳои гуногуни ҷаҳон, аз ҷумла дар Афғонистон ва як қатор давлатҳои мусулмонӣ ва таъсири манфии чунин вазъият ба минтақаи мо, изҳори нигаронӣ карда, таъкид бар он дошт, ки “сохторҳои дахлдори давлатҳои аъзои Созмони ҳамкории Шанхай барои дарёфти роҳҳои пешгирӣ аз хатарҳои эҳтимолӣ ва муборизаи беамон бо зуҳуроти он бояд пайваста ҷаҳду талош дошта бошанд”. Изҳори бовар карда шуд, ки натиҷаҳои ҳамоиши навбатии Шӯрои вазирони корҳои дохилӣ ва амнияти ҷамъиятии давлатҳои аъзои Созмони ҳамкории Шанхай дар шаҳри Душанбе ба таҳким ва густариши минбаъдаи заминаи қарордодию ҳуқуқии ҳамгироӣ барои таъмини сулҳу амният дар минтақа ва ҷаҳон мусоидат мекунад. Дар ин бора аз Хадамоти матбуоти Президенти Ҷумҳурии Тоҷикистон иттилоъ доданд.
XXX
Раиси вилояти Суғд Абдураҳмон Қодирӣ бо як сафари корӣ ба мавзеи Баҳористони шаҳри Истаравшан ва ноҳияи Ғончӣ ташриф оварда, бо фаъолони шаҳри Истаравшан ва ноҳияи Ғончӣ мулоқот намуд. Дар оғози мулоқот бо сокинон, ки дар бошишгоҳи саҳроии хоҷагии деҳқонии ба номи Абдуваҳҳоб Ҷумъаеви ҷамоати Яхтани ноҳияи Ғончӣ доир гардид, таъкид шуд, ки дар ин мавзеъ барои беш аз 25 ҳазор нафар аҳолии Истаравшану Ғончӣ шаҳраки нави Баҳористон бунёд мешавад. Таъкид гардид, ки барои дар оянда таъмин намудани сокинони Истаравшану Ғончӣ бо манзили зист бояд ба корҳои бунёдии шаҳраки Баҳористон таваҷҷӯҳи ҷиддӣ дода шавад. Иттилоъ дода шуд, ки дар ин мавзеъ наздик 20 муассисаи иҷтимоӣ, аз қабили мактабу боғчаи кӯдакон, бунгоҳҳои тиббӣ, марказҳои савдо, боғи фаҳангӣ ва ғайраҳо бунёд мешавад. Раиси вилоят аз соҳибкорону фаъолон даъват намуд, ки дар бунёди муассисаҳои хусусӣ ва биноҳои баландошёна саҳм гузоранд. Барои вусъати корҳои сохтмонӣ ва кӯмак ба сокинон дар ин мавзеъ ду бозори масолеҳи сохтмонӣ таъсис дода мешавад. Раиси вилоят ба роҳбарияти шаҳру ноҳияи Истаравшану Ғончӣ дастур дод, ки тибқи нақшаи генералӣ кӯчаҳои шаҳраки навбунёдро муайян намуда, барои сокинон шароити оғози корҳои сохтмониро фароҳам оваранд. Инчунин ба роҳбарияти шаҳру ноҳия дастур дода шуд, ки барои коҳиш додани раванди муҳоҷират дар минтақа марказҳои ҳунаромӯзӣ таъсис дода шавад.
XXX
Худи ҳамон рӯз Раиси вилоят Абдураҳмон Қодирӣ ба ноҳияи Спитамен, ташриф овард. Нахуст Раиси вилоят дар оғози мумфаршкунии роҳи аҳмияти маҳаллидоштаи байни деҳаи Куруш-Нови ноҳия иштирок намуд. Зимни мулоқот Абдураҳмон Қодирӣ ба сокинон иттилоъ дод, ки соли ҷорӣ ки 92,5 км роҳҳои ноҳияи Спитамен аз таъмир бароварда хоҳад шуд. Лозим ба ёдоварист,ки роҳи миёни деҳаи Куруш ва Нов 11 км буда, он бо маблағгузории мақомоти иҷроияи ҳокимияти давлатии вилоят навсозӣ мешавад. Абдураҳмон Қодирӣ аз сокинон даъват ба амал овард, ки дар корҳои бунёдкорӣ бетараф набошанд. Ҳамзамон Абдураҳмон Қодирӣ дастур дод, ки барои эҳёи ҳунарҳои миллӣ дар ноҳияи Спитамен чораҳои зарурӣ андешида шуда, барои бо касбу ҳунарҳои миллӣ, ба монанди адрасбофиву атласбофӣ, гилембофӣ фаро гирифта шудани занон мусоидат карда шавад. Дар ин бора хабарнигори Радиои Тироз иттилоъ медиҳад.
XXX
Дастаи Донишкадаи политехникии Донишгоҳи техникии Тоҷикистон ба номи академик М. Осимӣ, «Тяжёлый случай» дар даври ниҳоии озмуни «Маҳфили зарифон» ғолиб омада, ҷом ва тӯҳфаи таъсиснамудаи Лигаи олии «Маҳфили зарифон»-и вилоятро соҳиб гардид. Онҳо дар даври финалӣ рақибони худ — дастаҳои мунтахаби Донишгоҳи муосири Русия, Донишгоҳи давлатии Хуҷанд ва Донишгоҳи ҳуқуқ, бизнес ва сиёсати Тоҷикистонро аз рӯи шартҳои «Саломнома», «Видеоролик», «Озмуни сарварони дастаҳо» ва «Барномаи мусиқавӣ» шикаст доданд. Гуфта мешавад, ки ин дуюмин ғолибияти даста дар мавсими имсола маҳсуб меёбад. Дастаи мазкур дар рӯзҳои баргузории Наврӯз — 2015 дар шаҳри Бишкеки Ҷумҳурии Қирғизистон миёни 26 дастаҳои лигаи олии Осиёи Марказӣ ғолиб омада, соҳиби ҷоми ин кишвар гардида буд. Дар ин бора аз хадамоти матбуотии Раиси вилоят иттилоъ медиҳанд.
XXX
Вақтҳои охир дар кўчаву роҳҳои шаҳру ноҳияҳои вилоят, аз ҷумла шаҳри Хуҷанд ҳаракати воситаҳои нақлиёте, ки оинаҳояшон бо истифода аз плёнкаву ҳар гуна матоъҳо сиёҳу хира карда шудаанд, ба мушоҳида мерасад. Зимни бурдани назорат аз болои ҳаракати чунин воситаҳои нақлиёт, кормандони БДА вилоят далели идора намудани воситаҳои нақлиёти сиёҳшишаро бидуни иҷозатнома, ошкор намуданд. Ҳангоми бурдани назорат, аз ҷониби нозирони хадамоти роҳбонӣ дар ҳудуди ноҳияи Ҷ. Расулов, воситаи нақлиёти тамғаи «Ренджровер», таҳти идораи ронанда Сўҳроб Юсупов, соли таваллудаш 1983, ки сокини шаҳри Хуҷанд мебошад, боздошт гардид. Ронанда воситаи нақлиёташро бидуни иҷозатнома барои оинаҷои сиёҷкардашуда идора мекард. Нисбати номбурда протоколи маъмурӣ тартиб дода шуд. Роҳбарияти Шўъбаи БДА Раёсати ВКД Ҷумҳурии Тоҷикистон дар вилояти Суѓд ронандагон ва соҳибони воситаҳои нақлиётро ҳушдор месозад, ки барои бе иҷозати мақомоти БДА истифодаи воситаи наќлиёт бо оинаҳои сиёҳшиша, ё бо иҷозати мўҳлати эътибораш гузашта ё ин ки дар сана ва мўҳлати эътибори он доштани ислоҳот, инчунин барои идора намудани воситаи нақлиёт бо пардаҳои паҳлўӣ ва яклухти ақиб, ки дар сохтори воситаҳои нақлиёт аз тарафи заводи истеҳсолкунанда пешбинӣ нашудаанд ва идора кардани воситаҳои нақлиёт бо шишаҳои ойнагӣ худдорӣ намоянд. Дар ин бора корманди Дафтари матбуотии Шӯъбаи БДА Раёсати ВКД дар вилояти Суғд Диловар Ализода хабар медиҳад.
XXX
Тоҷикистон дар раддабандии нави Федератсияи байнулмилалии футбол, бо 173 имтиёз дар байни 209 тими миллӣ чаҳор зина боло рафт ва ҷойи 139-умро касб кардааст. Гуфта мешавад, ки мавқеи мунтахаби Тоҷикистон дар байни 46 дастаи миллии кишварҳои Осиё панҷ зина боло шуд. Дар ин қора Эрон дар ҷойи аввал, Ҷопон дар ҷойи дувум ва Кореяи ҷанубӣ дар ҷойи севум мебошанд. Дар байни 15 кишвари собиқи шӯравӣ бошад, Тоҷикистон мисли пешин дар зинаи 13-ум буда, аз Туркманистон ва Қирғизистон боло ҷой гирифтааст. Дар ин бора радиои Озоди хабар медиҳад.
Нет комментариев