Помидор растании яксола буда намудҳои гуногун дорад. Аслан маконаш Мексика буда, ба ҷумҳурии мо аз Русия дар замони шӯравӣ омааст. Номи онро фотилоҷон меномиданд.
Хосиятҳои шифобахшии он
Истеъмоли 100 грамм помидори тару тоза сеяки талаботи шабонарӯзии моро ба витамини С таъмин менамояд. Дар навбати худ витамини С масуният(иммунитет)-ро мустаҳкам намуда, пиршавии бармаҳалро пешгирӣ месозад. Ғайр аз витамини С дар таркиби помидор инчунин, витаминҳои гурӯҳи В мавҷуданд, ки фаъолияти системаи асабро беҳтар намуда, ҳолати пӯст, мӯи сар ва нохунҳоро хуб мегардонад. Калийи таркиби помидор барои беҳтар кардани фаъолияти дил мусоидат мекунад. Магний миқдори холестеринро кам намуда, пайдошавии санги гурдаро пешгрӣ менамояд.
Калсий низ дар таркиби помидор ба миқдори кофӣ мавҷуд аст. Он барои дандон ва устухонҳо муфид мебошад. Оҳан ва рӯҳи таркиби помидор ба солим мондани рагҳо мусоидат мекунад. Аммо боигарии асосии помидор ликопен ном модда мебошад, ки он ҳуҷайраҳои ҷисмро аз саратон ҳифз мекунад.
Агар баъзе сабзавот баъди ҷӯшонидан ё бирён кардан бисёр моддаҳои шифобахшро гум кунанд, дар помидор ин тавр нест. Чунончӣ, баъди ҷӯшонидан ё бирён кардани помидор миқдори ликопен дар помидор баръакс, сеяк меафзояд.
Табибон истеъмоли помидори тару тозаро барои табобати захми меъда, санги гурда ва камхунӣ тавсия медиҳанд. Кардиологҳо истеъмоли помидори тару тозаро барои беморони дилу раг муфид меҳисобанд. Парҳезшиносон боварӣ доранд, ки истеъмоли помидор ба касоне, ки аз фарбеҳӣ ранҷ мекашанд фоида дорад. Зеро дар таркиби помидор хром зиёд аст, ки вай гуруснагиро зуд рафъ месозад. Дар 100 грамм помидор ҳамагӣ 22 килокалория нерӯ мавҷуд аст.
Шираи помидорро дар тибби мардумӣ барои табобати захм ва сӯхтани пӯст истифода мебаранд. Серотинони таркиби помидор афсурдаҳолиро рафъ намуда, табъи болидаю хушҳолӣ меорад. Равоншиносон ба хулосае омаданд, ки ранги сурхи баланди помидор шефтагони ин сабзавотро хуштабъу зиндадил ва ҷавон нигоҳ медорад.
Таҳияи Шодмон Ашӯров
Нет комментариев