Боғи фарҳангу фароғатии ба номи Садриддин Айнӣ – муассисаи Мақомоти иҷроияи ҳокимияти давлатии шаҳри Душанбе ба шумор меравад.
Он дар қисмати шимолии ноҳияи Исмоили Сомонии шаҳри Душанбе воқеъ аст. Боғ дар охири солҳои 50-ум ва аввали 60-уми асри гузашта бунёд шудааст. Масоҳаташ 12 га.
Кӯчабоғи асосии боғ аз даромадгоҳи дуюм ба самти шимол тӯл кашида, ба ду гулгашт тақсим мешавад. Сохтори боғ шакли дароз дошта дар паҳлӯи хиёбони Абӯабдуллоҳ Рӯдакӣ ҷойгир шудааст. Гулгашти асосии он то майдони доирашакл тӯл кашида, ба дарвозаи дуюми боғ пайваст шудааст.
Дар боғ мувофиқи лоиҳа гулгаштҳои зебо, террасаҳо, айвонҳо ва дигар иншооти меъмориву ороишӣ бунёд шудаанд. Он дорои дарахту буттаҳо ва гулҳои гуногун мебошад. Аз дарвозаи асосӣ гулгашту оромгоҳи шахсони барҷастаи ҷумҳурӣ сар мешавад. Дар маркази боғ (лар гулгашти асосӣ) мақбараи устод Садриддин Айнӣ (муаллифи нимпайкара А.А. Мануилов) воқеъ аст, ки солҳои 1958 -1960 бунёд шудааст.
Дар гулгаштҳо роҳравҳо барои сайругашт, гӯшаҳои осоишу тафреҳ бо атраксионҳои мухталиф, аз ҷумла 7 чархофалак, арғунчакҳо ҷойгиранд. Аз самти ғарбии Боғ канале ҷорист, ки ба кӯли шабакаи оби ошомидании шаҳр мерезад. Боғ аз тарафи хиёбони устод Рӯдакӣ бо панҷараи филизии хушнақшунигор ва сутунҳои мудаввар иҳота шудааст. Дар ҳудуди Боғ бо обурангу назокати хос 15 намуд дарахтони сояафкану мевадор (2150 бех), аз ҷумла ақоқиё, булут, маҷнунбед, сада, лоладарахт, сафедор, чинор, гулбуттаҳои гуногун шинонда шудаанд. Ҳамчунин зиёда аз 10 намуд гулҳои мавсимӣ парвариш меёбанд.
Дар Боғ барои тафреҳу истироҳати мардум суфачаҳо, шипангҳо мавҷуданд, чойхонаю ошхона ва дӯконҳои нӯшобафурӯшӣ дар хизмати мардум қарор доранд. Дар маркази Боғ мавзее барои баргузории сӯҳбату вохӯриҳо ва чорабиниҳои фарҳангию ҳунарӣ дар рӯзҳои иду ҷашнвораҳо ҷойгир аст. Дар самти шимолии Боғ, рӯ ба рӯи даромадгоҳи асосӣ то моҳи ноябри соли 2017 оромгоҳи чанде аз чеҳраҳои шинохтаи илму фарҳанг ва сиёсати кишвар – Садриддин Айнӣ, Бобоҷон Ғафуров, Ҷаббор Расулов, Муҳаммад Осимӣ, Боқӣ Раҳимзода, Муқаддима Ашрафӣ, Камол Айнӣ бо ҳамсараш дафн карда шуда буданд, ки қабрҳои онҳоро (ба ғайр аз С. Айнӣ) ба Боғи Лучоб кӯчониданд.
Хулоса, Боғи ба номи Садриддин Айнӣ – гулгашти музайяне мебошад.
Нет комментариев