Ҳар фарди солимфикру боақл мехоҳад, ки дар зиндагӣ умраш дароз бошаду номаш ҷовидона монад.
Барои расидан ба ин ҳадафҳои олии инсонӣ чӣ бояд кард?
Қабл аз ҳама некиву накӯкорӣ!
Таваҷҷӯҳ намоед ба маслиҳати мо:
Нек, хуб, нағз, хуш — рамзи амалу кирдори писандидаи одамон буда, бар муқобили бад аст. Ҳар амале, ки бо диди нек анҷом мепазирад, подошаш низ хуш мегардад. Некӣ яке аз хислатҳои ҳамидаи инсонӣ аст, ки дар рафтору кирдори одамон зоҳир гашта, то имрӯз мисли амали хайр мақоми шоиста дорад.
Инсонҳои шарифу некбин маҳз ба воситаи некӣ номи худро ба таърих ворид кардаанд. Барои иҷрои ин амали савоб ҷоннисорӣ ва аз худ гузаштанҳо зарур мешавад. Новобаста аз он, ки амали хуб мукофот мегирад ё на, мо бояд ба иҷрои корҳои неку шоиста кӯшиш намоем.
Ҳар кӣ дар олам пайваста бо некӣ кӯшид, умри абад ёфт. Накӯкории саховатмандон, ҷонбозиҳои қаҳрамонон, шабзиндадории орифону шоирон ҳамчун нишони амали нек то замони мо расидааст. Баръакс, пастҳимматону бадкорон, маккорону бахилон ҳамчун образи манфӣ ба зобон гирифта шуда, мавриди танқид қарор мегиранд.
Аллбатта, некӣ бояд чун амали гуворо бетамаъ бошад. Дар сурати боисрор мукофот ҷустан амали кас нек ҳисобида намешавад. Некии ҳақиқиро мукофот худ истиқбол мегирад. Як нишони асосии некӣ дасткушодиву ҳимматбаландист. Касе бо некӣ ҳамсозӣ дорад, ҳамеша саодатманд ва дар амони Яздони пок аст.
Пайдост, ки дар олам касе ҷовид нест. Инсон вуҷуди миранда аст. Аммо кори неку амали хуш ҷовидонист. Лоиқ дар ин бора бамаврид гуфтааст:
Дунёи савдо бигзарад,
Андӯҳи дилҳо бигзарад,
Ҳам навбати мо бигзарад,
Аммо ба зери осмон.
Ҳамчун замини бекарон
Некӣ бимонад ҷовидон…
Мусаллам аст, ки некӣ новобаста ба тағйир ёфтани сохтори зиндагӣ, тарзи давлатдорӣ, паси сар гаштани қарнҳо ба сифати ахтари тобноки осмони тамаддун боқӣ хоҳад монд. Аз ин рӯ, моро зарур аст, ки дар ҳама ҳолат некӣ карданро фаромӯш насозем.
Доруи асосии ҷовидона зистан амали хайру савоб буда, давоми умри инсон ба ҳисоб меравад.
Пас, накӯкориву некандешӣ, некгуфториву некрафторӣ вазифаи муқаддаси ҳар сокини Ватан мебошад.
Модоме, ки чунин аст, биёед то метавонем барои ҳамдигар некӣ кунему накӯкориро пешаи асосии худ бидонем!
Ҳамеша инсони дорои номи неку кори нек бошед!
Ислом Бобоев
Нет комментариев