Баъди нисфирӯзии 15-уми сентябри соли равон бо иштироки Раиси шаҳри Хуҷанд Маъруф Муҳаммадзода бо омадани 25 автобусҳои нав ба фаъолияти боз як хатсайри автобуси №6 ҳусни оғоз бахшида шуд. Ин автобусҳо низ 12 метра буда, ҳар кадоме наздик 30 адад ҷойи нишаст дошта, беш аз 110 нафар мусофиронро ба манзил мерасонанд.
Хатсайри №6 хатсайри дохилишаҳрӣ буда, аз микроноҳияи 34 оғоз ба воситаи қисмати болои роҳи маҳаллаҳои 33, 32-юм равона шуда, ба василаи кӯчаи Султон Умар ва пули нав ба кӯчаи Гагарин пайваста мешавад, баъдан аз меҳмонхонаи «Эҳсон» гардиш намуда, ба воситаи кӯчаи Исмоили Сомонӣ ба кӯчаи Камоли Хуҷандӣ пайваст шуда, то мавзеи Галамайдон меравад.
Раиси шаҳри Хуҷанд Маъруф Муҳаммадзода зимни суҳбат бо роҳбарияти КДК «Нақлиёти мусофиркашони шаҳри Хуҷанд» баҳри роҳандозии низоми хуби хизматрасонӣ ба мусофирон, риояи одоби шаҳрдорӣ дастуру супоришҳо дода, таъкид дошт, ки ронандагон пеш аз ҳама баҳри беосеб расонидани мусофирон ва риояи вақти ҳаракат дар хатсайрҳоро таъмин намоянд. Ҳамзамон ба масъулини шуъбаи нақлиёт ва алоқаи шаҳри Хуҷанд дастур дода шуд, ки ҷиҳати ҳарчи зудтар роҳандозии пардохти кортӣ тадбирҳо андешида шаванд. Азнавсозии истгоҳҳо ва насби ҷадвали ҳаракати автобусҳо дар он масоили муҳими аввалиндараҷа арзёбӣ карда шуд, ки то охири мо ба анҷом расонида шавад.
Ҳамин тавр, теъдоди умумии автобусҳо, ки дар доираи лоиҳаи «Рушди нақлиёти ҷамъиятии шаҳри Хуҷанд», ки бо маблағгузории Бонки Аврупоии Таҷдид ва Рушд дар ҳаҷми 28, 8 миллион доллари амрикоӣ, ки дар шаҳри Хуҷанд амалӣ мегарданд, ҳамаи 100 адад автобусҳо расида омаданд ва дар 6 хатсайр ба фаъолият оғоз бахшиданд. Шуруъ аз рӯзи душанбе ҳаракати микроавтобусҳои беруназшаҳрӣ аз ҳудуди бозори «Сомон»-и шаҳри Бӯстон боз дошта мешаванд.
Дарвоқеъ ин автобусҳо баъди танаффуси тӯлонии беш аз 20 сола шуруъ аз 1 уми августи соли равон ба сайрхатҳои дохилии шаҳрию беруназшаҳрӣ ба ҳаракат даромаданд. Ин тадбир имкон дод, ки сатҳи хизматрасонӣ дар соҳаи нақлиёти мусофиркаш беҳтару хубтар ба роҳ монда шавад.
Тавре, ки қайд намудем, 20 сол инҷониб дар шаҳри Хуҷанд автобусҳо ҳаракат намекард. Бо мурури сол, ҷойи автобусҳоро микроавтобусҳо ба даст оварданд. Ва табиист, ки вобаста ба хизматрасонӣ бархе қоидавайронкунӣ, аз қабили аз меъёр зиёд ҳаракат намудан, дар ҷойи муқаррарнашуда таваққуф кардан, зиёд гирифтани мусофирон, тамбашавии микроавтобусҳо дар кӯчаҳои марказии шаҳр, берун аз истгоҳҳо истода мусофир гирифтан, ҷалби ноболиғон ба микроавобусҳо баҳри пулчинӣ аз мусофирон, ҳаракати бенизом дар кӯчаҳои шаҳр барои ба даст овардани мусофир, бо либосҳои хонагӣ идора намудани микроавтобус ва ғайраҳо ба мушоҳида мерасид, ки ин ҳама ба риояи маданияти шаҳрдорӣ халал эҷод менамуд. Мутаасифона бо вуҷуди гузаронидани рейдҳо бо ҷалби нозирони бозрасии давлатии автомобилӣ то ҳол чунин манзараҳо ба мушоҳида мерасад.
Бояд чунин тоифа дарк намоянд, ки шаҳри Хуҷанд дуюмин шаҳри бузургтарини Тоҷикистон буда, маркази маъмурии вилояти Суғд муайян шудааст. Он намунаи олии шаҳрдорӣ ба тамоми тоҷикони ҷаҳон аст. Мо бояд меъёру талаботи шаҳрнишинӣ ва шаҳрдориро марҳила ба марҳила такмилу ба танзим дарорем ва риоя созем.
Бо ин амали худ гуруҳе аз ронандагони микроавтобусҳо дур будан аз фарҳанги муоширати хеш нишон дода, ба бар намудани либосу намуди зоҳирии ба миллати мо бегона андешаи сайёҳонро нисбати маданияти волоямон зери суол қарор медиҳанд.
Ё худ чӣ гуна одоби баланди шарқиёна ва шаҳрдории тоҷиконаро бо ин кирдорамон муаррифӣ менамоем?.
Бояд қайд намуд, ки таъмини хизматрасонии нақлиётӣ ба мардум ҳамарӯза зери назорати қатъии Раиси шаҳри Хуҷанд Маъруф Муҳаммадзода қарор дошта, гуруҳҳои корӣ барои ба эътидол ва танзим намудани хатсайрҳо сафарбар карда мешаванд.
Ҳамаи тадбирҳои андешидамешуда аз ҷониби Роҳбарияти Мақомоти иҷроияи ҳокимияти давлатии шаҳр таҳлил ва баррасӣ гардида, танҳо барои манфиати мардум ва таъмини хизматрасонии баланди нақлиётӣ андешида мешавад.
Мо танҳо бо сабру таҳаммул, иродаи мустаҳкам, иттиҳоду сарҷамъӣ, саъю талоши аҳлона, заҳмати содиқонаву софдилона, масъулияти баланд ва ташаббусҳои созандаи сокинони шаҳр ба ҳадафҳои олии хеш мерасем ва шаҳри бостонии Хуҷандро аз имрӯза боз ҳам беҳтару ободтар менамоем.
Бояд мардум, сокинони шаҳри бостонии Хуҷанд дарк намоянд, ки мо ба марҳилаи рушд расидаем ва сатҳи зиндагии мо боло рафтааст. Ҷараёни якмароми зиндагии мо, ки бо мурури замон вобаста ба шароити пешомада муайян шуда буд, он бояд ҳатман такмил ёбад, фарҳанги шаҳрнишиниро боло бурд. Ворид шудани нақлиёти мусофиркаши беруназшаҳрӣ як тамоюли муваққатӣ буд ва имрӯз вобаста ба зиёд шудани сокинони шаҳр ва наклиёти ҷамъиятиву шахсӣ танзими онро низ андеша намоем.
Худи ҳаракати автобусҳои имрӯза дар шаҳр собит намуд, ки мардум як ҷузъи маданияти шаҳрдориро риоя намуда истодаанд. Яъне, сокинони шаҳр бо хоҳиши худ ба истгоҳҳои муайяншуда (на сари роҳу паскӯча) омада, мунтазири автобус шуда истодаанд. Гузашта аз ин ҳаракати автобусҳо ба шаҳри Хуҷанд ҳусни дигар зам менамояд, зеро дар тамоми шаҳрҳои бузурги олам танҳо автобусҳо ба мусофирон хизмат мерасонанд, на микроавтобусҳо.
Манбаъ: Дафтари матбуоти Раиси шаҳри Хуҷанд
Нет комментариев