Чойникҳоро аз замонҳои қадим халқҳои кӯчманчӣ истифода мебурданд. Баъдтар чойник саёҳати худро кам намуда, дар хонаҳои истиқоматӣ маскан гирифт. Якумин чойникҳои барқии замони шӯравӣ ноқили дарози барқӣ дошта, дар қатораҳои роҳи оҳан, ҳуҷраи хобгоҳҳо, корхонаҳо васеъ истифода бурда мешуд.
Айни ҳол дар бозору мағозаҳо чойникҳои гуногуни барқӣ бо танаи пластмасиро дидан мумкин аст. Беҳтарини онҳо мансуби ширкатҳои номдори ҷаҳонӣ «Тефал, Браун, Бинатон, Сименс, Витек, Ровента, Мулинекс» мебошанд. Чойникҳои барқӣ бо танаи пластмасии ин ширкатҳо сифатнок ва сабуквазн буда, об дар онҳо тақрибан дар муддати аз 3 то 4 дақиқа меҷӯшад. Ҳарорати танаи чойник то 88 градус гарм мешавад, ки ба стандарт мувофиқат дорад. Пас аз 5 сония баъди ҷӯшидани об чойники барқӣ бо танаи пластмасӣ кори худро қатъ мегардонад.
Ҳангоми истифодабарии чойникҳои барқӣ бо танаи пластмасӣ ба чунин маслиҳатҳои мо эътибор диҳед:
Пас аз харидорӣ намудани чойники нав обро дар он секарата ҷӯшонед. Он гоҳ бӯи нохуши пластмаса ба димоғатон намерасад ва оби ҷӯшонидаатон маззаи пластмасаро намедиҳад. Барои ҷӯшонидан бояд оби аз филтр гузаронидашуда ё оби аз хлор хориҷгаштаро истифода баред. Танаи чойникро бо матоъпораи нам пок кунед. Бо модда ё хокаҳои тозакунанда чойникро тоза кардан мумкин нест, зеро он боиси харошида шудани танаи чойник мегардад.
Карахш чист ва аз карахш (накип) чойникро чӣ тавр бояд тоза кард? Карахш дар натиҷаи дар танаи дарунӣ таҳнишин шудани намаки калий ва магний ба амал меояд. Карахш аслан безиён аст, лек кори чойникро ба тезӣ қатъ мегардонад. Тарзи тозакунӣ аз карахш чунин аст. Бодиққат бошед, азизон. Ба 500грамм об 25 грамм афшураи лимӯро ҳал намуда, ба дохили чойник резед. Пас аз 1 соат чойникро ҷӯшонед. Карахш бояд тамом шавад.
Султон Иномӣ
Нет комментариев