Хонандагони азизу арҷманд! Аз ин пас дар Медиапортали «Тироз» бахши нав таҳти унвони «Мадади Сино» омода ва ҷой дода мешавад. Ҳадафи асосии бахш бо кӯмаку дастгирии мутахассисону коршиносони соҳаи тиб, саҳмгузорӣ дар пешгирии бемориҳои мухталиф, роҳҳои табобати саривақтӣ, мубориза бар зидди онҳо, ташаккул додани таҳаммулпазирӣ, муносибати неку бомасъулият дар ҷомеа нисбат ба беморон, пешниҳоди маслиҳату тавсияҳои муфиду зарурӣ ҷиҳати нигаҳдории саломатӣ, интихоби дурусти тарзи ҳаёти солим ва баланд бардоштани маърифати тиббии шаҳрвандон маҳсуб мешавад.
Агар хоҳед, ки ҳамеша саломату сиҳатманд бошед, Бахши «Мадади Сино»-ро пайваста мутолиа намоед!
Бахши «Мадади Сино» барои саломатии Шумост!
Дар нашри нахустин зарур донистем, ки оид ба бемории «Сил», таърихи пайдоиш ва роҳҳои пешгириву табобати саривақтии он бароятон чанд маълумот ва маслиҳати зарурӣ диҳем. Инак, мутаваҷҷеҳ бошед!
Сил — бемории сирояткунанда аст ва аз шахси бемор ба одами солим бо роҳи ҳавои қатрагӣ мегузарад. Ҳангоми сулфа, атса, партофтани балғам ва сухан кардани шахси бемор ба муҳити атроф қатраҳое хориҷ мешаванд, ки онҳо дар худ барангезандаҳои бемории силро доранд. Шахси солим аз ин ҳавои заҳролудшуда нафас кашида, метавонад сироят ёбад. На ҳамаи сироятёфтагон гирифтори беморӣ мешаванд, зеро қувваҳои масъунияти бадан бо барангезандаи бемории сил мубориза бурда, бадани одамро эмин медоранд.
Бемории сил бемории ирсӣ (авлодӣ) нест.
Сабабҳои паҳншавии беморӣ паст будани сатҳи огоҳии аҳолӣ оид ба роҳҳои сироятёбӣ, усулҳои пешгирӣ ва табобат, мавҷуд будани бофтаву хаёлҳо дар бораи беморӣ, инчунин тамғагузорӣ нисбат ба беморони сил мебошанд.
Аслан «сил» ё худ «туберкулёз» аз калимаи лотинии «tuberculum» гирифта шуда, маънояш «лӯндача» ва ё «арзана» мебошад. Он бемории дар ҷаҳон хеле паҳнгардидаи бактериявии инсон ва ҳайвоноте ба шумор меравад, ки барангезандаи он микробактерияи сил (чӯбчамикроби Кох) мебошад.
Бемории сил (БС) асосан ба шуш осеб расонида, баъзан ба узвҳо ва системаҳои дигар низ таъсири бад мерасонад. Бояд донист, ки бемории сил табобатшаванда ва пешгиришаванда аст.
Аз таърихи пайдоиш
Соли 1882 дар Олмон Роберт Кох пас аз 17 соли кор дар лаборатория барангезандаи бемории силро кашф намуд, ки онро батсилаи Кох (БК) ва ё чӯбчамикроби Кох номиданд. Ҳангоми зери микроскоп таҳқиқ намудани балғами шахси гирифтори бемории сил, ӯ барангезандаеро пайдо кард. Ҳоло духтурони силшинос аз истилоҳи МБС (микробактерияи бемории сил) истифода мебаранд.
Бемории сил аз инсон ба инсон тавассути ҳаво ва оби даҳон паҳн мегардад. Ҳангоми сулфазанӣ, атсазанӣ ва ё балғампартоӣ бактерияҳои бемории сил аз шахсони гирифтори беморӣ ба ҳаво паҳн мешаванд. Барои сироятшавии инсон танҳо нафас кашидани миқдори камтарини чунин бактерияҳо кифоя аст.
Тақрибан аз се як ҳиссаи аҳолии ҷаҳон гирифтори бемории сили ниҳонӣ мебошанд. Хавфи гирифтори бемории сил шудани онҳо дар тӯли ҳаёти худ 10 фоизро ташкил медиҳад. Аммо ба шахсоне, ки системаи масъунияташон заиф аст, ба монанди беморони ВНМО, нокифоягии ғизо, диабет ва ё тамокукашӣ, хавфи зиёди дучоршавӣ ба ин беморӣ таҳдид мекунад.
Хонандагони азиз, дар бораи намудҳои бемории сил, нишонаҳои он, ташхиси сили шуш, усули техникӣ, роҳҳои табобат, бахусус бо дорувории нав бо номи «Бедаквилин» ва ғайра дар маводи навбатӣ маълумоти бештар хоҳем дод. Бахши «Мадади Сино»-ро пайгирӣ намоед!
Нет комментариев