26-28 ноябри соли равон дар шаҳри Душанбе Форуми иқтисодии навбатии СПЕКА-2024 (Барномаи махсуси иқтисодии Созмони Милали Муттаҳид барои кишварҳои Осиёи Марказӣ ва Озарбойҷон) дар мавзуи «Рушди сабз дар минтақаи СПЕКА» баргузор мегардад, хабар медиҳад АМИТ «Ховар» бо истинод ба Вазорати рушди иқтисод ва савдои ҷумҳурӣ.
СПЕКА (Барномаи махсуси иқтисодии Созмони Милали Муттаҳид барои кишварҳои Осиёи Марказӣ ва Озарбойҷон) соли 1998 бо ташаббуси Созмони Милали Муттаҳид таъсис шудааст. Ҳадафи асосии он мусоидат ба рушди иқтисодӣ ва таҳкими ҳамкории минтақавӣ мебошад. Давоми солҳои фаъолият Барномаи махсуси иқтисодии Созмони Милали Муттаҳид барои кишварҳои Осиёи Марказӣ ва Озарбойҷон ба масъалаҳои муҳим, ба мисли савдои устувор, рақамикунонӣ, обу энергетика ва нақлиёт диққати махсус медиҳад.
Форуми иқтисодии навбатии СПЕКА-2024 (Барномаи махсуси иқтисодии Созмони Милали Муттаҳид барои кишварҳои Осиёи Марказӣ ва Озарбойҷон) дар асоси пешниҳоди Президенти Ҷумҳурии Тоҷикистон муҳтарам Эмомалӣ Раҳмон дар ҷаласаи СПЕКА соли 2023 дар шаҳри Бокуи Ҷумҳурии Озарбойҷон дар Душанбе баргузор мегардад.
Ин чорабинии сатҳи баланд нақши калидии Тоҷикистонро ҳамчун ташаббускори рушди минтақавӣ нишон дода, дар масъалаҳои ҳифзи муҳити зист, рушди «сабз» ва ҳамкории минтақавӣ аҳамияти махсус дорад.
Дар кори форум зиёда аз 100 намояндаи кишварҳои аъзои Барномаи махсуси иқтисодии Созмони Милали Муттаҳид барои кишварҳои Осиёи Марказӣ ва Озарбойҷон ва ташкилоти бонуфузи байналмилалӣ иштирок намуда, дар самтҳои калидии рушди минтақавӣ ва ҳамкории муштарак мубоҳиса мекунанд.
Манбаъ: АМИТ «Ховар»
Нет комментариев