Санаи 12 август тариқи сӯзонидан 34 кг 390 гр героин, 214 кг 563 гр афюн, 605 кг 483 гр бангдона, 272 кг 504 гр ҳашиш ва дигар намуди моддаҳои нашъадор несту нобуд карда шуданд. Дар ин бора АМИТ “Ховар” бо истинод ба Вазорати корҳои дохилии Ҷумҳурии Тоҷикистон хабар медиҳад.
Дар чорабинии мазкур кормандони мақомоти корҳои дохилӣ дар ҳузури намояндагони ВАО, мақомоти прокуратура, суд ва дигар ташкилоту идораҳои марбута зиёда аз як тонна навъҳои гуногуни ин бори марговарро тариқи сӯзонидан маҳву нобуд намуданд.
Дар ин чорабинӣ ҳабҳои нашъадори синтетикӣ, аз ҷумла, 216 гр “Амфетамин”, 1кг 971 гр “Метамфитамин”, 1кг 946 гр “Метадон”, 1кг 127 гр “Алпразолам” низ тариқи сӯзонидан маҳв карда шуданд.
Ёдовар мешавем, ки маводи нашъадори сӯзонидашуда он далелҳои шайъие буданд, ки аз гурӯҳҳои нашъаҷаллоб мусодира гардидаву нисбаташон ҳукми суд содир шудааст.
Манбаъ: АМИТ «Ховар»
Нет комментариев