Санаи 8 июл дар таваллудхонаи шаҳри Кӯлоб тифле бо 8 килограм вазн ба дунё омад. Табибони ин бемористон мегӯянд, ки дар таърихи Тоҷикистон чунин тифл бо ин вазн ба қайд гирифта нашудааст.
Рухсорамо Муродова, табиби навзодони таваллудхонаи шаҳри Кӯлоб гуфт, ки ин тифл бо буриши қайсарӣ ба дунё омада, 8 кило вазн дошт.
Муродова афзуд, ки қади ин писарчаи навзод 60 сантиметрро ташкил медиҳад ва рӯзҳои аввал бинобар азимҷусса будан, саломатиаш миёнаи вазнин арзёбӣ мешуд, аммо бо гузашти чаҳор рӯз, сиҳатии кӯдак мӯътадил аст.
«Аз сабабе, ки бисёр азимҷусса буд, мо аз кислород истифода мебурдем, вале ҳозир дигар худаш мустақилона нафас мегирад. Дар рӯзи таввалуд шудан ҳашт килограм буд, аммо бо гузашти чаҳор рӯз ҳоло вазнашро партофта, 7,200 грамм шудааст. Ростӣ, ман 20-сол шуд дар ҳамин таваллудхона фаъолият дорам, бори аввал таваллуд шудани кӯдакӣ ҳашткилограмаро дидам. Вазни миёнаи нормалӣ то 4 килограм ҳисоб мешавад», — гуфт Рухсорамо Муродова.
Модари ин навзод Таҳмина Одинаева, сокини 30-солаи деҳаи Корези ҷамоати Зиракии Кӯлоб аст. Чаҳор фарзанди қаблии ӯ ҳини таваллуд аз 3 то 4 килограмм вазн доштаанд. Таҳмина Одинаева гуфт, худашро хуб ҳис мекунад ва бо вуҷуди вазнин будани тифл дар батнаш, бовар надошт, ки писараш 8 килограм ба дунё меояд.
Искандаршоҳ Худойназаров, падари ин тифл гуфт, ҳамсараш дар Тоҷикистон ё шояд дар ҷаҳон бо ин тифли ба дунё овардааш, «рекорд» гузошта бошад.
Манбаъ: Новости Центральной Азии
Нет комментариев