То фарорасии Иди соли нави мелодӣ, рӯзҳои башумор боқӣ мондаанд. Мусаллам аст, ки кӯдакони хурдсол дар ин ид гирифтани тӯҳфаҳоро аз волидайн ё ин ки Бобои барфӣ бесаброна интизор мешаванд. Аз ин рӯ, мо калонсолон кӯшиш мекунем, ки барои кӯдаконам тӯҳфаи беҳтаринро омода созем, то ки ин ид барояш хотирмон бошад.

Саволе ба миён меояд, ки ба кӯдакони синнусоли мухталиф чӣ бояд тӯҳфа кард?  Оё ҳангоми интихоби тӯҳфа ба синнусоли онҳо бояд эътибор дод?

Мехоҳем чанд маслиҳати худро вобаста ба ин масъала бароятон пешниҳод созем:

 Хусусиятҳои инкишофи тифлони соли якуми ҳаёт: тифлони ин синнусол ҳоло бозӣ намекунанд, вале бозичаҳо барои онҳо шавқоваранд: аз ҷиҳати шакл, ранг ва махсусан бозичаҳое, ки садо мебароранд. Майдаяк бо дасту пойҳояш кӯшиши доштани онҳоро мекунад, ки ин ба инкишофи мушакҳои ӯ мусоидат менамояд. Барои кӯдаконе, ки аллакай нишаста метавонанд, бозичаҳое шавқоваранд, ки ламскунӣ, биниш, шунавоӣ ва ҳаракати кӯдакро ташаккул медиҳанд.

 То 1 сола

Тӯҳфаҳо: шақшақаи ҷиллодори шавқангез, шақшақаи резинӣ барои дандончаҳои аввалин, бозичаҳое, ки диққати кӯдакро ба худ ҷалб мекунанд, кубикҳо, аҳромчаҳо, нохобакҳо (бозичаҳое, ки ҳангоми ғелонидан боз рост мешаванд).

Хусусиятҳои инкишофи кӯдакони 1 — 3 сола: дар ин синнусол онҳо беҳад серҳаракатанд ва барояшон, инчунин бозичаҳои механикии ҳаракаткунанда басо мароқоваранд. Маҳз дар ҳамин синн кӯдакон олами гирду атрофро дониста мегиранд, мехоҳанд ба калонсолон тақлид кунанд ва худро модар ва ё падар эҳсос кунанд.

1 — 3 сола

 Тӯҳфаҳо: аробачаи бачагона, равонак (тележка)-ҳои майда, бозичаҳое, ки онҳоро тела ва ё аз бандакаш кашола мекунанд, мошинчаҳои боркаш, лӯхтакҳо, лавозимоти бозичагини ошхона, чангкашакҳо, мошинаҳои ҷомашӯӣ, телефонҳо, китобчаҳои расмдор, қолабчаҳо, белча барои бозӣ дар кӯча ва тахтача барои расмкашӣ дар девор.

Хусусиятҳои инкишофи кӯдакони 3 — 5 сола: инкишофи қобилияти фикрии кӯдакон ҳамоно давом меёбад. Духтарчаҳои хурдсол оро додани худ ва омода кардани дастархонро дӯст медоранд. Писарбачаҳои хурдсол бошанд, вақти худро бо мошинчабозӣ мегузаронанд. Боз дар ин айём олами касбҳо шавқовар мегардад.

3 — 5 сола

Тӯҳфаҳо: мозайка, асбобҳои сохтмон, лавозимоти духтурӣ, баландгӯяки мусиқӣ, дучарха, мошинчаҳо, проектор барои расмкашӣ, лавозимоти чойнӯшӣ.

Хусусиятҳои инкишофи кӯдакони 5 — 7 сола: дар ин марҳила бачаҳо ба зинаи дигар мегузаранд – ба мактаб тайёр мешаванд. Бозии кӯдаконро маҳдуд кардан нашояд. Ба ин гурӯҳи синнусолӣ фишор овардан нашояд. Волидайн мефаҳманд, ки танҳо бозичаҳои махсус мувофиқанд. Муҳим он аст, ки кӯдакон омӯзанд ва инкишоф ёбанд.

5 — 7 сола

Тӯҳфаҳо: бозиҳои компютерӣ ва лавозимоти варзишӣ, конструкторҳо, лӯхтакҳое, ки онҳоро хӯронидан, хобонида алла гуфтан ва худро ҳамчун модари ҳақиқӣ тасаввур кардан мумкин аст, лижаҳо, чана, мӯзачаҳои чархдор (ролик), самокат, дучарха, таҷҳизот барои бозиҳои сюжетӣ-ролнок (мазмунноку нақшофарӣ).

Хусусиятҳои инкишофи бачагони хурди мактабӣ, 7 — 9 сола: ин овони муҳаққиқони ҳақиқӣ ва ихтироъкорон аст. Дар ин синнусол ба бачаҳо маҷмӯаҳое, ки барои донистани олам аз ҳар ҷиҳат кӯмак мерасонанд, шавқоваранд.

7 — 9 сола

 Тӯҳфаҳо: маҷмӯаи физикони ҷавон, кимёгарон ва ғайраҳо, микроскопҳо, конструкторҳои электронӣ, барои духтарон маҷмӯаҳо барои расмкашӣ, бофтан, дӯхтан ва ғайраҳо.