Аз ҷониби Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон соли 2019 — 2021– Соли рушди деҳот, сайёҳӣ ва ҳунарҳои мардумӣ эълон карда шуд. Медиапортали «Тироз» ба ин хотир бахши наверо бо номи «Мӯъҷизаофар» дар ҳамкорӣ бо Кумитаи иҷроияи вилояти Суғдии Ҳизби халқии демократии Тоҷикистон таҳия ва пешниҳоди Шумо-хонандагони азизу арҷманд менамояд.
Бахши «Мӯъҷизаофар» аз фаъолияти ҳунармандон қисса намуда, бо ҳадафи муттаҳид намудани онҳо ва дастгириву расонидани кӯмак ба фаъолияти ҳунармандон омода мегардад. Дар ҳар як маводи бахш оид ба таърихи пайдоиш, аз насл ба насл гузашта, то ба замони имрӯз расида омадани баъзе аз ҳунарҳои қадима, эҳёи баъзе аз ҳунарҳои азбайнрафта, раванди имрӯзаи пешрафти ин ё он ҳунар, машғул шудани ҳунармандон бо ҳунарҳои миллӣ, харидоргир будани маҳсули меҳнати онҳо маълумотҳои ҷолиб ва зарурӣ пешниҳод карда мешаванд. Бахши «Мӯъҷизаофар» бо Шумо ва барои Шумост!
Дар ҳунар кӯш, ки зар чизе нест,
Ганҷу зар пеши ҳунар чизе нест.
Ҳунаре неҳ, ки диҳад симу зарат,
Ҳунари аз дилу ҷон ранҷбарат.
Воқеан, ҳунар сармояи гаронест, ки онро бо ягон дороӣ, сарват, симу зар иваз кардану харидан номумкин аст. Ҳунар ба инсон бузургию шаҳомат бахшида, ӯро болидарӯҳ мегардонад. Ҳунар зиндагиро зебоӣ мебахшад. Шахси боҳунар дарахти босамареро мемонад, ки шабеҳи меваҳои болаззату хӯрданбоб аст. Шахси боҳунар дарёеро мемонад, ки онро ҳар замон обест зулолу ошомиданӣ.
.JPG)
Заҳмату кору ҳунар касро намоянд номдор,
Олиҳиммат кас зи ҳастии ҳунар мумтоз шуд.
Шахси ҳунармандро ҳар як дақиқаи умр ғанимат аст ва онро бамаврид истифода мебарад. Намегузорад, ки лаҳзае ройгон гузарад. Аз донае хирмане месозад, аз матое ҷомае медӯзад, аз гуле гулзор ҳосил мекунад. Бо дастони ҳунарманду бузургу меҳнатофаринаш ақли бинандаро асир месозад. Ҳунарҳои волои ҳунармандони асилро дида, бешубҳа онҳоро ҳунармандони бузург номгузорӣ мекунем, ки ин номҳои бузург бе меҳнату заҳмати зиёд ба даст намеоянд. Барҳақ гуфтаанд:
Бе дарду ранҷ ганҷ муяссар намешавад,
Музд он гирифт ҷони бародар, ки кор кард.
Музди меҳнати азими кас агар аз як тараф маош бошад, аз тарафи дигар, омӯхтани ҳунари бузург аст. Ҳамаи ҳунарҳо ҳангоми омӯзиш душворие доранд, ранҷе доранд, ки касро дилгир месозанд, вале кам одамоне ёфт мешаванд, ки ин душвориҳоро паси cap намоянду ҳунаре омӯзанд. Бехабар аз он ки омӯхтани ҳар як ҳунари воло инсонро дар зиндагӣ воломақому соҳибтаҷриба ва бузургдилу баобрӯй мегардонад. Тавре бузургон мегӯянд: «Ҳунар давлати поянда ва чашмаи зоянда аст».
Ҳунарманди асил бо ҳунари волои худ дар ягон давру замон ба касе ё чизе мӯҳтоҷ намешавад. Дастнигар намешавад, зеро худ кони ҳунари волост. Ҳунар як коргоҳи бузургест, ки доимо ҳамсафари касони боистеъдод аст. Яъне, ҳунарманд коргоҳ намеҷӯяд ва ба куҷое, ки равад, метавонад бо дастоварди бузурги худ музде пайдо намояд, ки боиси рӯзгузарониаш шавад. Илова бар ин, бо ҳунари волояш машҳур гашта, қудрату манзалати зиёд пайдо мекунад.
Хонандагони арҷманд, ин буд маводи нахустини бахши нави «Мӯъҷизаофар», ки ба Соли рушди ҳунарҳои мардумӣ бахшида мешавад. Хотиррасон менамоем, ки ҳамкори бахши «Мӯъҷизаофар» Кумитаи иҷроияи вилояти Суғдии Ҳизби халқии демократии Тоҷикистон мебошад.
Медиапортали «Тироз»
Нет комментариев