Дар маҷлисгоҳои хурди Мақомоти иҷроияи ҳокимияти давлатии вилояти Суғд машварати кории назди Раиси вилоят баргузор гардид.
Дар машварат муовинони Раиси вилоят, роҳбарони воҳидҳои сохтории мақомоти иҷроияи ҳокимияти давлатии вилоят, ташкилоту идораҳо ва раисони як қатор шаҳру навоҳӣ ширкат варзиданд.
Вусъати корҳои ободониву созандагӣ, баланд бардоштани сатҳу сифати таълиму тарбия ва ҳамзамон хизматрасонии тиббӣ, омодагии саривақтӣ ба давраи тирамоҳу зимистони солҳои 2018-2019, даъвати тирамоҳии ҷавонон ба сафи Қувваҳои мусаллаҳи мамлакат, беталаф ҷамъоварӣ намудани пахта ва дигар маҳсулоти кишоварзӣ аз ҷумлаи масъалаҳое буданд, ки дар машварат мавриди баррасӣ қарор гирифтанд.
Ҳамзамон ҳисоботи муовинони Раиси вилоят оид ба рафти корҳои ободониву созандагӣ ба истиқболи 30-солагии Истиқлолияти давлатии Ҷумҳурии Тоҷикистон ва дигар масъалаҳои ҷорӣ шунида шуд. Қайд гардид, ки дар ин раванд дар тамоми шаҳру навоҳии вилоят корҳои созандагӣ вусъати тоза пайдо намудаву иншооти гуногуни иҷтимоиву иқтисодӣ бунёд ва мавриди баҳрабардорӣ қарор мегирад.
Раиси вилоят зимнан таъкид дошт, ки бо ҳидоятҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон то ҷашни 30-солагии Истиқлолияти давлатӣ дар мамлакат ҳазорҳо иншооти гуногун бунёд ва мавриди истифода қарор дода мешавад, ки бешак барои боз ҳам беҳтар шудани сатҳи зиндагии мардум мусоидат менамояд.
Бо баррасии масъалаҳои ҷорӣ Раиси вилоят ба масъулин ҷиҳати чароғонкунии кӯчаҳо, дар сатҳи баланд ба роҳ мондани даъвати тирамоҳии ҷавонон, пурзӯр намудани корҳои тарғиботиву ташвиқотӣ байни аҳолӣ ва пешгирии шомилшавии ҷавонон ба гурӯҳҳои тундрав, бунёди майдончаҳои варзишӣ, бартараф намудани норасоии кадрӣ дар соҳаҳои маорифу тандурустӣ, берун баровардани дорухонаҳо аз дохили беморхонаҳо, таҷҳизонидани муассисаҳои тиббӣ бо дастгоҳҳои муосир, зиёд намудани ҳаҷми содироти молу маҳсулот, аз ҷумла асал, ворид намудани сармояи мустақим, беҳтар намудани фаъолияти Минтақаи озоди иқтисодии “Суғд”, бунёди гармхонаҳои замонавӣ, таъсиси корхонаҳои муштарак, назорати татбиқи лоиҳаҳои сармоягузорӣ, ҷамъоварии пахта, таъмини фаъолияти муназзами корхонаҳои коркарди аввалияи пахта, ҷамъоварии дигар маҳсулоти кишоварзӣ, аз ҷумла картошка, захираи меваву сабзавот, захираи хошоки дурушт, зиёд намудани ҳаҷми истеҳсолот, самараноку оқилона истифода бурдани замин дастуру супоришҳои мушаххас дод.
Манбаъ: Хадамоти матбуоти Раиси вилояти Суғд
Нет комментариев