Гурзандози машҳури тоҷик, Чемпиони бозиҳои олимпӣ соли 2016 дар Рио-да-жанейро Дилшод Назаров, дар мусобиқаи қаҳрамонии Осиё, ки дар шаҳри Бҳубанешвари Ҳиндустон баргузор гардид , бо натиҷаи 76 метру 69 сантиметр мақоми аввалро касб кард ва бо медали тилло сарфароз шуд. Ин пирӯзии чоруми Дилшод Назаров дар мусобиқаи қаҳрамонии Осиё, ҳамин тавр варзишгари машҳури тоҷик қаҳрамони чоркаратаи Осиё гардид. Дар сабқати ниҳоии қаҳрамонии Осиё рӯзи 8-уми июл ёздаҳ нафар гурзандозони зӯртарини қора ширкат доштанд, ки онҳо намояндагони даҳ кишвар буданд: Ҷопон (ду кас), Бангладеш, Кореяи Ҷанубӣ, Қатар, Индонезия, Малайзия, Тоҷикистон, Ҳиндустон, Чин ва Эрон. Мақоми дувум ва медали нуқра бо натиҷаи 73 метру 81 сантиметр насиби Шизу Ванг (Чин) гардид. Медали биринҷӣ барои мақоми севум ба Ювунчул Ли (Кореяи Ҷанубӣ, 73,77 метр) супурда шуд. Дар мусобиқаи қаҳрамонии Осиё дар Бҳубанешвари Ҳиндустон варзишгарони 45 кишвар ширкат доранд. То ҳоло намояндагони 19 кишвар барандагони медалҳо гардидаанд. Варзишгарони 9 кишвар – Ҳиндустон, Чин, Эрон, Қазоқистон, Ветнам, Қирғизистон, Тайланд, Тоҷикистон ва Узбакистон бо медалҳои тилло мукофотонида шудаанд.
Манбаъ: Сомонаи «Варзиштв.тҷ»
Нет комментариев