Аввали моҳи май дар шаҳри Остона Форуми соҳибкории Тоҷикистон ва Қазоқистон баргузор мегардад. Дар ин хусус АМИТ «Ховар» бо истинод ба Кумитаи давлатии сармоягузорӣ ва идораи амволи давлатии Ҷумҳурии Тоҷикистон иттилоъ медиҳад.
Дар Форуми соҳибкорӣ намояндагони сохторҳои марбутаи давлатии Тоҷикистон ва Қазоқистон ва соҳибкорони ҳар ду давлат дар самтҳои саноат, кишоварзӣ, сохтмон, сайёҳӣ, хизматрасонӣ, логистика ва фармасевтӣ иштирок менамоянд.
Пайдо намудани шарикони тиҷоратӣ байни соҳибкорон ва тавсеаи ҳамкории тиҷоративу иқтисодии Тоҷикистон ва Қазоқистон аз ҳадафҳои асосии форум арзёбӣ мегардад.
Интизор меравад, ки дар доираи форум вохӯриҳои дуҷонибаи соҳибкорони Тоҷикистон ва Қазоқистон дар сиғаи «соҳибкор бо соҳибкор» (B2B) ва бахши давлатию хусусии ҳар ду ҷониб доир гардад. Аз рӯйи натиҷаи вохӯриҳо баимзорасонии санадҳои ҳамкорӣ байни доираҳои соҳибкории ҳар ду давлат дар назар дошта шудааст.
Манбаъ: АМИТ «Ховар»
Нет комментариев