Фирдавс Муҳиддинов

Инак, имрӯз мо хостем бо сарояндаи номдори шаҳри Хуҷанд, оне, ки дар оилаи санъаткори номӣ ба дунё омадааст Фирдавс Муҳиддинов — писари шодравон Муҳаммадҷон Муҳиддинов сӯҳбате ороста бошем.
Фирдавсҷон салом арз мекунам, сараввал аз номи худам, аз номи таҳиягарони радиои “Тироз”, аз номи муҳаррирони медиапортали “Тироз” ва ҳамзамон аз номи мухлисонатон.
Фирдавс Муҳиддинов: Салом, салом, ба ҳамаи Шумоён, кормандони радиои “Тироз”, омодакунандагони медиапортали “Тироз” ва ба ҳамаи мухлисонам!

Сараввал дар бораи худ барои мухлисон маълумоте медодед. Масалан кай дар куҷо таваллуд шудаед?

Фирдавс Муҳиддинов: 20 октябри соли 1983 дар шаҳри бостонии Хуҷанд, дар оилаи санъаткори шинохта, ҳофизи эстрадаи тоҷик Муҳаммадҷон Муҳиддинов чашм ба олами ҳастӣ кушодаам. 2-мин фарзанди хонадон. Мисли дигар ҳамсолонам ба мактаб мерафтам, футболбозӣ, ошуқпарронӣ… хулоса аз дигар бачаҳо фарқе надоштам. фаъолияти эҷодии худро аз хурдӣ оғоз кардаам.
Мегуфтед, ки оғози фаъолияти эҷодиатонро кай оғоз кардед, айни ҳол дар кадом сатҳ қарор дорад ва нақшаҳои минбаъдаи Шумо чӣ гуна аст?

Фирдавс Муҳиддинов

Фирдавс Муҳиддинов: Соли 2003, аввалин маротиба дар театри мазҳака ва мусиқавии Камоли Хуҷандӣ, дар чорабинии “25 солагии фаъолият дар эстрадаи тоҷик”-и падари бузургворам Муҳаммадҷон Муҳиддинов баромад кардам. Ин бошад, ҳам пешниҳоди падарам буд. Мумкин ҳамон солҳо, обрую нуфузи падарам дар ҷодаи санъат, маро ба сурудхонӣ водор намесохт- чунки Муҳиддинови сароянда ягона буд ва ба сатҳи он кас расида боз як Муҳитдинов-ро дар саҳна офаридан ба фикру хаёлам ҳам намеомад. Ҳамон даврвҳо, хонаи мо пур аз эҷодиёт ва таронаҳои падарам буд. Лек афсӯс, умри санъаткори асил — Муҳитддинов Муҳаммадҷон, кӯтоҳ будааст…

Баъди дафни падар, дӯстони наздики он кас ба ман муроҷиат намуданд, ки ман касби падари шодравонамро давом диҳам. Аз ин лиҳоз, барои дастгирии маънавии оилаамон, мухлисони сершумор ва асосииаш барои хотираи руҳу арбоҳи падари бузургворам ман қарор кардам, ки ба саҳна ҳамчун сарояндаи касбӣ бароям..

Мегӯянд, ки ба ғайр аз интихоби ин ё он касб инсон як шавқу ҳаваси хоси худро дорад, яъне хобби. Лутфан мегуфтед, ки Шумо ягон хобби доред?

Фирдавс Муҳиддинов: Бале, асосан аз варзиш бозии волейболро мепарастам, камтар вақт ёбам ҳам ҳатман ба ин бозӣ машғул мешавам.

Фирдавсҷон чигуна хислат доред?
Фирдавс Муҳиддинов: Оромтабиат ҳастам.

Беҳтарин, кадом хислатҳои инсониро мепазиред?

Фирдавс Муҳиддинов: Аз ҳама хислатҳои писандидаи ман худотарсӣ. Инсон бояд дурӯғ нагӯяд, хоксор ва саховатманд бошад. Шахси комил бояд ба ҳеҷ кас ҳеҷ гоҳ бадӣ нахоҳад, чи хеле, ки мегӯянд — боғи бахил беҳосил. Барои пеш рафтани кори ягон нафар монеа эҷод накунад.

Аслан ҳамаи мо шогирд ҳастем, ҳамин тавр не Фирдавсҷон, бар замми ин шогирде ҳам дорем, ки ҳамеша онро ба интихоби роҳи дурусти ин ё он касб ҳидоят мекунем, Шумо худ шогирд доред?

Фирдавс Муҳиддинов

Фирдавс Муҳиддинов: (Механдад).
Ман худ шогирд ҳастам, бале агар ман ҳам дар оянда мисли падари меҳрубонам ба миллатам қадрдон гардам, барои чӣ не, шогирд мегирам ,тарбия мекунам ва барои баланд бардоштани санъати тоҷик саҳми худро мегузорам. Лекин айни ҳол шогирд надорам.

Дар консертҳое, ки пешкаши мухлисонатон мегардонед чигуна хонишу навозишро дар онҷо истифода мебаред, ман гуфтаниям, ки нигоҳи Шумо ба хониш ва навозиши зинда чӣ гуна аст?

Фирдавс Муҳиддинов: Хеле саволи бамаврид аст. Мепарастам.Аслан худи хониши зинда ва навозиши зинда, ба кас илҳому ҳаловат мебахшад. Ман кӯшиш мекунам, дар консертҳои худ, хонишу навозиши зиндаро истифода барам.

Ҳар як санъаткори асил мехоҳад ба касе монанд бошад, ё ин ки касеро ҳамчун кумири худ мепарастад? Шумо киро мепарастед?

Фирдавс Муҳиддинов: Оҳҳо… Албатта шодравон падари бузургворам Муҳаммадҷон Муҳиддинов, Кароматулло Қурбонов, Фарҳоди Дарё, Аҳмади Зоҳир.

Ташаккур, барои маълумотҳои ҷолиб, барои дилгир нашудани Шумо як саволи аҷоиб, агар Шумо миллион доллар медоштед ба куҷо ё кадом кор сарфа мекардед?

Фирдавс Муҳиддинов: (Механдад).
Аҷоиб, агар миллион доллар медоштам ба камбизоатон дасти ёрӣ дароз мекардам, сипас агар боқӣ монад клипҳои худро дар Амрико сабт менамудам. Лекин сараввал камбизоатро дастгирӣ мекардам.

Дар ҳаёти инсон хоҳ дар вақти фаъолият хоҳ дар хона, лаҳзаҳое ҳастанд, ки хеле хандовару аҷоиб, ягонтоашро ба ёд меовардед?

Фирдавс Муҳиддинов: (Боз механдад).
Лаҳзаҳои хандовар хеле бисёр, лекин якеашро ки ба ёдам айни ҳол омад мегӯям. Ҳангоми сабти клипу суруди “Доллар-доллар”, дар он ҷо доллари ҳақиқиро истифода карда будем, баъди сабт ҳама ба долларчинӣ машғул шуданд, яктоаш гум шуд, наёфтем, сипас хеле кофтем, дар хотир надорам намедонам баъд аз куҷое пайдо шуд. Лекин ҳолати маро то дарёфт, шумо ба фикрам тасаввур намудед. (Механдад).

Ва ниҳоят нақшаи эҷодии Шумо дар соли 2015 ва оянда чӣ гуна аст?

Фирдавс Муҳиддинов: Ташаккур барои Шумоён, аҳли кормандони медиапортал, ҳамзамон радиои “Тироз”, ки вақти хешро дареғ надошта барои анҷоми сӯҳбати самимӣ маро даъват намудед,нақшаҳои хеле бисёр дорам, мехоҳам соли равон бахшида дар зодрӯзи падарам консерте баргузор намоям ва барои мухлисон беҳтарин клипҳои худро омода намуда пешкаш намоям.

Сабтҳои Фирдавсро шумо аз поён шунида метавонед: