Пешгӯӣ намудани натиҷаи бозиҳои Чемпионати ҷаҳон-2018, ки як моҳ дар Россия давом кард, бо роҳу усулҳои аҷоибу ғароиб таваҷҷуҳи мухлисонро ба худ кашид. Дар Тоҷикистон ин шуғли боварнакарданиро ояндабини футболи ҷаҳонӣ – шутури Боғи ҳайвоноти Душанбе — Мария ба зимма гирифт. Мария беминнату беподош пеш аз ҳар як бозӣ медонист, ки дастаи мунтахаби кадом кишвар ғолиб мебарояд ва кадом даста барандаи Ҷоми ҷаҳон-2018 мегардад.
Хоҳ бовар кунед, хоҳ не, ягон пешгӯии ин ҷонвари безабон хато набаромад. Тавре сомонаҳои иҷтимоӣ иттилоъ медиҳанд, Мария натиҷаи бозиҳои Русия — Арабистони Саудӣ, Уругвай — Франсия, Хорватия — Англия ва Франсия — Хорватияро дуруст пешгӯӣ кард.
Санаи 12-уми июл, як рӯз баъди анҷоми бозиҳои нимфиналӣ, Мария «пешгӯӣ кард», ки маҳз дастаи яккачини Франсия барандаи Ҷоми ҷаҳонии футбол мешавад. Мария рӯзи панҷшанбе зери навори видеоии Радиои Озодӣ аз миёни ду табақи сабзавот, ки дар яке парчами давлати Франсия ва дар дигаре парчами давлати Хорватия насб шуда буд, ба сӯи аввалӣ рафт ва сабзавоти онро тановул кард. Ин, маънои онро дошт, ки дастаи мунтахаби Франсия дар даври финалӣ дастболо мешавад. Таҷриба се бор такрор шуд ва ҳар дафъа Мария ба сӯи «табақи» Франсия рафт.
Ин эътимод ба Мария аз он ҷост, ки бори охир ӯ дар остонаи бозии нимфиналии 11-уми июл пирӯзии Хорватияро бар Англия бехато пешгӯӣ карда буд.
Инак, санаи 15-уми июл дар бозии футбол миёни дастаҳои Франсия ва Хорватия, бо натиҷаи 4 : 2 дастаи мунтахаби Франсия дастболо шуд ва соҳиби Ҷоми ҷаҳон-2018 гардид.
Бо ин васила маротибаи 4-ум пешгӯии шутур — Мария боз ҳам дуруст баромад!
Аз ин сабаб, месазад, ки бо баробари дастаи футболбозони Франсия ояндабини футболи ҷаҳонӣ – шутури Боғи ҳайвоноти Душанбе — Марияро чемпиони ҷаҳон-2018 ном барем!
Ҷоми ҷаҳон-2018 муборак!
Медиапортали «Тироз»
Нет комментариев