Муҳити табиию географии Тоҷикистон хело мураккаб аст, ки ҳарҷониба омӯхтани он аҳамияти калони иктисодӣ дорад. Қариб дар ҳамаи ноҳияҳои кишвари мо вобаста ба сохти геологӣ, чашмаҳои гуногуни обҳои минералӣ ба вуҷуд омаданд.
Танҳо дар солҳои охир шароитҳои табии ва сарватҳои зеризаминии Тоҷикистонро ноҳия ба ноҳия омӯхта, дар бораи чашмаҳои обҳои минералӣ ҳам маълумотҳои гуногуни илмӣ гирд оварда шудаанд. Дар натиҷа маълум гардид, ки аксари чашмаҳои Тоҷикистон барои ташкил кардани шифохонаҳо, хонаҳои истироҳату санаторияҳо ва умуман барои рушди туризм дар Тоҷикистон мебошад.
Яке аз чунин чашмаҳо чашмаи Гармчашма мебошад. Ин чашма маҷмааи табобатӣ-истироҳатӣ, чашмаи гармоби минералӣ ва яке аз ёдгориҳои табии ва экологии Тоҷикистон мебошад. Як омили муҳими осоишгоҳ қарор гирифтани макони ҷойгиршавии чашмаҳо бар замми табобат бо оби чашма обу ҳавои форами маҳал аст, ки барои шифо ёфтан аз бемориҳои дил, системаи асаб, миён, пой, пўст ва касалиҳои занона мусоидат менамояд.
Чашмаи минералии Гармчашма дар баландии 2325 метр аз сатҳи баҳр, дар ноҳияи Ишкошими Вилояти мухтори Кӯҳистони Бадахшон, дар ғарби нишебии силсилакӯҳҳои Шоҳдара, дар мобайни ҷараёни дарёи Гармчашма, шохоби дарёи Панҷ ҷойгир шудааст. Дар километри 42, дуртар аз шаҳри Хоруғ осоишгоҳи Гармчашма, ки аз якчанд чашмаи шифобахш иборат аст, амал мекунад.
Чашма соли 1928 аз ҷониби минерологи рус А.Н. Лубенсов кашф карда шудааст. Чашма умри чандинҳазорсола дорад, зеро дар тўли чандинасраи мавҷудияташ дар ин ҷо таҳшинҳои оҳаксанг (шўшаҳои оҳак) ҷамъ шуда, ба тарафи дарё чун шалола овезонанд. Соли 1957 дар ҷои баромади обҳои минералӣ табобатгоҳи «Гармчашма» бунёд гардид, ки баъдан чандин маротиба тармиму бозсозӣ шудааст.
Нет комментариев